“Bakı-2015”in idman elçisi: “Hər dəfə məşq zamanı daha yaxşı nəticə göstərməyə çalışıram”

“Ötən il Avropa çempionatında Azərbaycanı təmsil etmək mənim üçün qürurverici idi”. Futbolxeber.az-ın “Azərtac”a istinadən verdiyi məlumata görə, bu sözləri birinci Avropa Oyunlarının idman elçisi, velosipedçi Elgün Əlizadə deyib.

Velosiped idmanı ilə yeddi ildir məşğul olduğunu vurğulayan Elgün Əlizadə deyib ki, bu müddət ərzində gənclər arasında Azərbaycan və Bakı çempionu titullarını qazanmışam. Bundan başqa, ötən il qitə çempionatında 12-ci yeri tutmuşam və ən yüksək nəticəmə nail olmuşam.

İsveçrəli velosipedçi Fabian Kançelaranın azarkeşi olduğunu bildirən “Bakı-2015”in elçisi deyib: “Məşqlərdə hər dəfə daha yaxşı nəticə göstərməyə çalışıram. İdmanın triatlon növü mənim üçün çox maraqlıdır. Çünki burada peşəkar velosipedçi üçün lazım olan üzgüçülük və qaçış da var. Dayanmadan bir neçə saat velosiped sürmək olduqca çətindir. Ancaq artıq buna öyrəşmişəm”.