“Birinci Avropa Oyunlarında iştirak edəcəyim günü səbirsizliklə gözləyirəm”

“Böyük Britaniyanı ilk Avropa Oyunlarının atıcılıq yarışlarında təmsil edəcəyim üçün çox xoşbəxtəm. Birinci Avropa Oyunlarında iştirak edəcəyim günü səbirsizliklə gözləyirəm”. Futbolxeber.az-ın “Azərtac”a istinadən verdiyi məlumata görə, bu sözləri “Bakı-2015” ilk Avropa Oyunlarının atıcılıq yarışlarında Böyük Britaniyanı təmsil edəcək Seonayd Makintoş deyib.

Oyunlarda iştirakın növbəti şans olduğunu vurğulayan idmançı bildirib ki, artıq ikinci dəfə çoxnövlü yarışda mübarizə aparacağam. Ötən il Qlazqoda təşkil olunan Birlik Oyunlarından sonra müəyyən təcrübəm var. Hər zaman böyük idman yarışlarının bir parçası olmaq istəmişəm. “Bakı-2015” məhz arzuladığım irimiqyaslı idman yarışlarındandır. Əminəm ki, Azərbaycanda təşkil olunacaq yarış mənim üçün böyük həyəcanla bərabər, həm də gələcək karyerama güclü təkan verəcək.

“Bakı-2015” ilk Avropa Oyunlarının atıcılıq yarışlarında 210 kişi və 120 qadın idmançı qızıl medal uğrunda mübarizə aparacaq. Yarışlar iyunun 16-dan 22-dək 9 kişi, 6 qadın və 4 qarışıq komanda arasında təşkil olunacaq. Bununla yanaşı, 15 fərdi yarışda qalib gələcək idmançılar “Rio-2016” Yay Olimpiya Oyunlarında birbaşa iştirak etmək hüququ qazanacaqlar.