Fariz Məmmədov “Maşın” şouda açıqladı: “Noyabrda dünya çempionluğu uğrunda vuruşacağam”

Azərbaycanın ilk peşəkar boksçusu Fariz Məmmədov bu gün ANS telekanalında yayımlanan “Maşın” reailiti şousunda qonaq olub. Futbolxeber.az-ın məlumatına görə, Məmmədovu coşqu ilə səhnəyə dəvət edən şounun aparıcısı Murad Dadaşov, peşəkar boksçumuzun mayın 2-də Almaniyada Heydər Əliyevin xatirəsinə həsr olunmuş döyüşdə nokautla qələbə qazandığını bildirib.

Dəvətə görə minnətdarlıq edən Məmmədov, yarış iştirakçılarına uğurlar arzulayıb: “İlk növbədə hamını salamlayıram. Yarış iştirakçılarını da. Qoy, güclü qələbə qazansın. Bu şouya çox tamaşa edirəm. Hər zaman səbirli və doğru olan qalib gəlir”.

Qarşıdakı planları haqda danışan Fariz Məmmədov dünya çempionluğu uğrunda mübarizə aparacağını qeyd edib: “Qarşıda bizi çox vacib döyüş gözləyir. Noyabrda dünya çempionluğu uğrunda döyüşəcəyəm. Böyük ehtimalla, görüş Qəbələdə baş tutacaq”.

Sonda isə F.Məmmədov “Maşın” realişiti şousunun aparıcısı Murad Dadaşova arxasında onun adı və soyadı yazılmış “Qəbələ” futbol klubunun 13 nömrəli formasını təqdim edib.