Teymur Rəcəbov: “Debütdən necə razı qala bilərəm ki...”

Bakıda keçirilən şahmat üzrə Qran-Pri turnirinin 9-cu turunda Teymur Rəcəbov Rusiya təmsilçisi Sergey Karyakinlə heç-heçə oynayıb. Futbolxeber.az-ın məlumatına görə, partiyadan sonra Rəcəbov oyunu haqda danışıb: "Debütümdən çox razı qaldım. Əlbəttə, bu bir zarafatdır. Necə debütdən razı qala bilərəm ki, ilk 5 gediş üçün 1 saat düşünməli oldum. Oyun normal alındı. Sadəcə hazırlıqdan kənar gedişlər etməli oldum. Oyunu təhlil etmişdim, sadəcə vaxtı ilə oynadığımız gedişləri gözləmirdim. Müəyyən fiqurlar əvəzetməli oldum. Qeyri-adi gedişlər yox idi. Oyun heç-heçəyə gedirdi. 1998-ci ildə Kramnikin oynadığı partiyaya bənzərlik var idi. Həmin illərdə yaşım az olduğundan indi o gedişləri təhlil etmək düzgün olmazdı”.

Sergey Karyakin də partiyadakı gedişlərin 1998-ci ildə rusiyalı dünya çempionu Vladimir Kramnikin oyununa bənzədiyini söyləyib: "Kramnik tərəfindən oynanılan gedişlərə bənzərlik çox idi. Pozisiyanı təhlil etmişdim. Rəqib düzgün oynamağa çalışırdı. Ağlar da başqa variant görünürdü. Sadəcə oyun heç-heçəyə yönlənmişdi. Maraqlı gedişlər var idi, sadəcə sonda heç-heçəylə razılaşdıq”.