Şəhriyar Məmmədyarov: “Buradakı çıxışım mənə dərs oldu”

Azərbaycanın mərhum şahmatçısı Vüqar Həşimovun xatirəsinə həsr olunan “Shamkir Chess 2014” turnirinin son turunda Şəhriyar Məmmədyarov Sergey Karyakinlə heç-heçə edərək, sonuncu yeri tutub. Lent.az-ın məlumatına görə, Məmmədyarov görüşdən sonra jurnalistlərə açıqlamasında çıxışından razı qalmadığını bildirib.

 

O deyib: “Aqressiv oynayırdım. Bəzən lazımsız risk edirdim. Qələbə qazanmaq istəyirdim, amma məğlub olurdum. Buradakı çıxışım mənə dərs oldu. Etiraf edirəm ki, yaxşı formada deyiləm. Təşkilatçılara və xüsusilə jurnalistlərə təşəkkür edirəm. İlk gündən bütün media turniri yaxından izləyir. Səmimi etiraf edim ki, dostum və komanda yoldaşım Vüqar Həşimovun xatirəsinə həsr olunan turnirdə çıxış etmək çox çətin idi. Risk etməyimə səbəb Vüqara həsr olunan turniri qazanmaq istəyim idi. Vüqar bizi tərk etdi. Amma Azərbaycan şahmatçılarına daim arzuladıqları böyük turniri bəxş etdi”.

 

“Shamkir Chess 2014”ün bütün şahmat dünyasına töhfə olduğunu deyən Məmmədyarov “Synergy Group”a minnətdarlıq edib. O, turnirin yüksək təşkilatçılıq baxımından dünyada analoqunun olmadığını söyləyib: “Heç bir yarışda şahmatçılara belə yüksək diqqət göstərilməyib. Şahmat turnirlərinə görə biz Veyk-An-Ze şəhərini tanıyırıq. İndi Şəmkiri də bütün şahmat aləmi tanıyır”.

 

Tanınmış şahmatçı sonda bir xahiş edib: “Təşkilatçılardan “Shamkir Chess 2014”ü hər il keçirməklə, ənənəvi yarış etməsini xahiş edərdim. Çünki, bu turnir Azərbaycanın böyük oğlu, hamımızın çox sevdiyi Vüqar Həşimova həsr olunub. Ümid edirəm ki, növbəti illərdə Azərbaycan şahmatçıları turnirin qalibi olacaq”.

 

Qeyd edək ki, turnirdə Şəhriyar Məmmədyarov 3 xalla sonuncu yeri tutub. Qalib adını isə 6,5 xal yığan Maqnus Karlsen qazanıb.