Elşad Quliyevdən qələbə şərhi

“Möhtəşəm turnir keçirildi. Avropa Minifutbol Federasiyasını təbrik edirəm. Təşkilatçıların əziyyəti danılmazdır. Xalqımızı və komandamı çempionluq münasibəti ilə təbrik edirəm”.

Futbolxeber.az saytının məlumatına görə, bu sözləri minifutbol millimizin baş məşqçisi Elşad Quliyev deyib.

Mütəxəssis Slovakiyada keçirilən Avropa çempionatında Ukraynanı məğlub etdikləri (2:0) final oyunundan sonra fikirlərini bölüşüb:

“Ağır qrafiklə oynayırdıq, güclü rəqiblərlə üz-üzə gəldik. Bu isə kollektivi yordu. Finala yorğun çıxmışdıq. Oyunçuları möhtəşəm finalı başa vurduqları üçün xüsusi təbrik edirəm".

E.Quliyev Ukrayna millisinin də yaxşı heyətinin olduğunu əlavə edib:

"Ukrayna millisinin yaxşı oyunçuları var. Onlar da bu gün pis oynamadılar. Biz yarışa gəlməmişdən əvvəl böyük işlər görmüşdük. Avropa çempionatının çətin keçəcəyini bilirdik. Belə güclü komandalarla oynadıqdan sonra finala çıxacağımızı hesablamamışdıq. Belə çempionluq məni ikiqat sevindirir. İlk çempionluqda daha asan komandalarla oynayırdıq".

Qeyd edək ki, Azərbaycanın minifutbol millisi tarixində ikinci dəfə Avropa çempionu olub.