Minifutbol millimizə Slovakiyada möhtəşəm dəstək

Slovakiyada keçirilən minifutbol üzrə Avropa çempionatında bu gün Azərbaycan millisi yarımfinalda Serbiya ilə üz-üzə gələcək. Buna qədər qitə birinciliyində keçirdiyi 5 oyunun hamısında qalib gələn yığmamızın uğurlu çıxışında azarkeşlərin də böyük rolu var.

İstər Avropa Minifutbol Federasiyasının, istərsə də Azərbaycan Minifutbol Federasiyasının feysbuk səhifələrində paylaşılan fotolarda digər komandalarla müqayisədə oyunlar zamanı Azərbaycan yığmasının azarkeşlərinin çoxluğu diqqət çəkir. Təbii ki, bunda Azərbaycan Minifutbol Federasiyasının əməyini mütləq qeyd etmək lazımdır. Xatırlayırsınızsa, hələ çempionatın startından öncə Azərbaycan Minifutbol Federasiyası sosial şəbəkə hesabları vasitəsi ilə Avropada yaşayan soydaşlarımıza müraciət etmişdi. Müraciətdə Bratislavada keçiriləcək Avropa çempionatında mübarizə aparacaq yığmaya dəstək məqsədilə həmin şəhərdə və yaxın ölkələrdə yaşayan azərbaycanlılar oyunlara dəvət olunmuşdu. Həmin vaxt da qeyd edilmişdi ki, tribunalardakı dəstək komanda üçün əlavə motivasiya mənbəyi olacaq.

Geridə qalan müddətdə federasiyasının bu addımının özünü doğrultduğunu əminliklə söyləmək olar. Yığmamızın keçirdiyi 5 oyunda azarkeşlərin dəstəyi, coşğusu millimizin gücünə güc qatır. İnanaq ki, azarkeşlərin möhtəşəm dəstəyi ilə yığmamız son iki matçını da qələbə ilə başa vuraraq tarixində ikinci dəfə Avropa çempionu olacaq. Uğurlar, milli! Uğurlar, bizimuşaqlar!

Futbolxeber.az