"Olimpiakos" "Qarabağ"a qalib gəlsə, böyük mükafat qazanacaq

"Olimpiakos" futbolçuları Avropa Liqasının Liqa mərhələsinin 8-ci turunda "Qarabağ"ı məğlub edəcəkləri halda böyük məbləğdə pulla mükafatlandırılacaqlar.

Futbolxeber.az saytının məlumatına görə, "Olimpiakos"un prezidenti Evangelos Marinakis Yunanıstan çempionatının 20-ci turunda "Panatinaikos"la matçdan sonra futbolçularla görüşüb. O, 1:1 hesablı heç-heçəyə baxmayaraq, komandanın oyunundan razı qaldığını bildirib. Klub prezidenti bu heç-heçəni qələbəyə bərabər hesab etdiyini vurğulayıb və "Qarabağ"a qalib gələcəkləri təqdirdə onları böyük məbləğdə pulla mükafatlandıracağını deyib:

"Bugünkü oyuna görə hamınızı - futbolçuları, məşqçiləri təbrik edirəm. Təəssüf ki, matçın taleyini hakim qərarları həll etdi. Oyun ərzində üstün tərəf biz idik. Siz meydanda 10 nəfər qalmışdınız, amma 12 və ya daha çox insanın ruhu ilə oynadınız. Çoxlu qol imkanları yaratdınız, "Olimpiakos"a layiq şəkildə çıxış etdiniz. Bilirsiniz ki, bu matç mənim və azarkeşlərimiz üçün çox şey deməkdir. Siz mənim üçün qalibsiniz. "Olimpiakos" belə oynamalıdır! "Qarabağ"a qalib gəlsəniz, premium mükafat alacaqsınız. Bütün gücünüzü ortaya qoyun, belə oynamağa davam edin. Əgər bu cür davam etsəniz, klubumuzun şanslı tarixinin 100 illiyində çempion olacağıq".

Qeyd edək ki, yanvarın 30-da Yunanıstanda keçiriləcək "Olimpiakos" - "Qarabağ" oyunu Bakı vaxtı ilə saat 00:00-da başlayacaq.