“Ayrı səbət olsaydı, bəlkə də ÇL-in finalında 2 Azərbaycan klubu qarşılaşardı”

“Artıq üçüncü dəfə idi ki, Çempionlar Liqasına qatılırdıq. Əvvəlki iki ildə bir qədər bəxtimiz gətirməmişdi”.

Futbolxeber.az saytına açıqlamasında bu sözləri “Birbaşa Bakı”nın heyətində Çempionlar Liqasının qalibi olan Mirmehdi Rzayev deyib.

O, qazanılan uğurda pay sahibi olanlara təşəkkürünü bildirib: “Bu dəfə turnirə qalib olmaq üçün yollanmışdıq. Əvvəlki illərlə müqayisədə turnirə daha yaxşı hazırlaşmışdıq. Yekunda da nəticə qazandıq. Qazanılan uğurda böyük payı olan komandamızın kapitanı Kamil müəllimə (komandanın kapitanı Kamil Məmmədov nəzərdə tutulur - İ.C.), İlkin müəllimə (komandanın təsisçisi İlkin Qəribli nəzərdə tutulur - İ.C.) təşəkkürümü bildirirəm. Əziyyətimizi çox çəkdilər”.

M.Rzayev 1/8 finalda digər Azərbaycan klubu, ölkə çempionatının gümüş medalçısı “Aznur”la qarşılaşmalarından da söz açıb:  “Əlbəttə, istəməzdik ki, məhz 1/8 finalda onlarla qarşılaşaq. Çünki bilirdik ki, “Aznur” da bu turnirə çox yaxşı hazırlaşmışdı. Onlar da çox güclü kollektivdirlər. Hələ Bakıda olarkən keçirdiyimiz yoldaşlıq oyunlarında buna bir daha şahid olmuşduq. “Aznur” ayrı səbətdə olsaydı, bəlkə də onlarla finalda görüşə bilərdik. Çempionlar Liqasının finalında iki Azərbaycan klubu qarşılaşardı”.

İbrahim Cəfərov