20 Iyun 2024, Cümə axşamı
Millimiz FİFA reytinqində irəlilədi
“Avro-2024: Futbolxeber.az-la qazan!”
"Qarabağ"ın ÇL-dəki rəqibi müəyyənləşdi
"Şamaxı"da fransalı yarımmüdafiəçi

Minifutbol

“Millimiz ən azı dördlüyə düşməli idi” - Mütəxəssis rəyi

RƏCƏB FƏRƏCZADƏ: “BİR QƏDƏR DİNAMİKANI, SÜRƏTİ ARTIRSAYDILAR, MEYDANDA TOPSUZ DAHA ÇOX HƏRƏKƏT ETSƏYDİLƏR...”

Minifutbol üzrə ölkə çempionatının gümüş medalçısı “Aznur”un baş məşqçisi Rəcəb Fərəczadənin Futbolxeber.az saytına müsahibəsi

 

- Milli komandamız Avropa çempionu titulunu qoruya bilmədi. Yığmamızın mübarizəni belə erkən dayandırması sizin üçün nə dərəcədə gözlənilməz oldu?

- Son Avropa çempionu olaraq millimiz ən azından dördlüyə düşməli idi. Hamı komandadan bunu gözləyirdi. Biz o nailiyyəti qazanmışıqsa, çətin olsa da, onu qorumağa çalışmalıydıq. Qazaxlar çox yaxşı komandadırlar. Dünya çempionatında da onlar bizi dayandırdılar.

- Uğursuzluğun səbəbini nədə görürsünüz?

- Konkret bir səbəb görmürəm. Komandamızda bir qədər dinamika çatmırdı. Bəzi oyunçularda hərəkətlilik çox az idi. Millimiz 3-4 dəqiqə interval ilə iki beşliklə oynayırdı. Bir qədər dinamikanı, sürəti artırsaydılar, meydanda topsuz bir az çox hərəkət etsəydilər, bəzi boşluqlar tapmaq olardı.

- Titulu qorumaq üçün yarışa yollanan kollektivin yarımfinala belə yüksələ bilməməsini fiasko saymaq olar?

- Fiasko deməzdim. Qrup oyunlarını komandamız 9 xalla başa vurdu. Həm də unutmayaq ki, qazaxlar son dünya çempionatının ikincisidilər, zəif deyillər.

- Nəticə bir kənara, sırf oyun baxımından komandamızın çıxışına necə qiymət verə bilərsiniz? Sosial şəbəkələrdə azarkeşlər bildirirdilər ki, milli komandamız əvvəlki Avropa çempionatındakı kimi parlaq oyun sərgiləmir...

- Azarkeşlər azarkeş kimi baxır. Onların fikrinə nəsə deyə bilmərəm. Amma mənim gördüyüm odur ki, komandamız elə görünürdü ki, sanki bəzi oyunçularda o qədər motivasiya yox idi. Hərəkətlilik az idi. Hərəkəti artırsaydılar, nəticə əldə etmək olardı.

- Baş məşqçini heyət baxımından qınayanlar da çoxdur. İstər qitə çempionatına aparılan heyət, istərsə də bu Avropa çempionatının gedişində meydana buraxılan heyətin düzgün olmadığı barədə fikirlər səslənir.

- Hər məşqçi öz prinsipindən yanaşır. Yalnız bunu deyə bilərəm.

- Razısız ki, uğur qazanmaq üçün gücdən əlavə, bəzən müəyyən idman hiyləgərliklərinə də əl atmalısan? Məsələn, qrupda son turda Fransaya uduzub ikinci yeri tutsaydıq, finala gedən yolumuz daha rahat olardı.

- Razıyam ki, 1/8 finaldan etibarən millimiz çox çətin tərəfdə yer aldı. 1/4 finalda qazaxlar, sonra rumınlar... Digər tərəfdə isə zəif komandalar yer almışdı. Finala qədər ciddi müqavimət görməyəcəkdik. Ən azından hiyləgərlik də göstərmək lazımdır. Daha zəif rəqiblə qarşılaşmaq olardı. Amma ümumi götürdükdə çempion olmaq üçün əvvəl-axır istənilən rəqiblə üz-üzə gəlməlisən. Ola bilər məşqçilər korpusu hesab edib ki, 1/4 finalda qazaxlarla, daha sonra rumınlarla üz-üzə gəlmək millimizin xeyrinədir. 

- Dünya çempionatından sonra Avropa çempionatında da medalsız qaldıq. Gələn il isə mundiala ev sahibliyi edəcəyik. Fikrinizcə, bu 1 il ərzində nələri dəyişmək lazımdır ki, 2025-ci ildə dünya çempionatında daha yaxşı çıxış edək?

- Dünya çempionatına ev sahibliyi etmək bizim üçün ikiqat məsuliyyətdir. Amma minifutbolun inkişafı tək milli komandadan asılı olan məsələ deyil. İlk növbədə Azərbaycan çempionatı daha səviyyəli, daha maraqlı keçməlidir. Eləcə də bəzi işlər görülməlidir ki, 21, 23 yaşlı komanda olsun. Hər komandada 1, ya 2 cavan oyunçu limitinə ehtiyac var. Əsas problemlərdən biri də futbolçuların eyni zamanda 2-3 liqada oynamalarıdır. Bu səbəbdən də matçlara tam ciddi hazırlaşa bilmirlər - səhər bir oyun, axşam başqa oyun. Böyük futboldan futzala, futzaldan minifutbola, minifutboldan da dəniz futboluna keçid edirlər. Onları qınamıram. Məvacib az olduğu üçün başqa yerlərdə də oynamaq məcburiyyətində qalırlar. “Birbaşa Bakı”, “Zirə”, bir qədər də “Aznur”u çıxmaq şərti ilə digər komandalar həftədə 1 dəfə məşq edirlər. Klublarda məşqlərin sayı artırılmalıdır. Bunun üçün də maliyyə durumun imkan verməlidir ki, ən azı icarəyə zal götürüb məşq edə biləsən. Ümumiyyətlə, bu, bir qədər geniş müzakirədir. Hər şeyi millinin üstünə atmaq olmur. İstənilən halda inanıram ki, 2025-ci ildə daha fərqli komanda görəcəyik.

İbrahim CƏFƏROV




Şərh yazılmayıb
ŞƏRH YAZ
Adınız, Soyadınız *  
E-mail    
Təhlükəsizlik kodu    
Kodu daxil edin *  







Arxiv

Iyun 2024
B.eÇ.aÇC.aCŞB
01 02
03 04 05 06 07 08 09
10 11 12 13 14 15 16
17 18 19 20 21 22 23
24 25 26 27 28 29 30