“Mingəçevir” komandası "Kamaz"la toqquşub, xəsarət alanlar var - YENİLƏNİB

Bu gün “Mingəçevir” futbol komandası I Divizionun 20-ci turu çərçivəsində “Şamaxı” ilə səfər oyununa gedərkən yolda avtomobil qəzasına uğrayıb.

Futbolxeber.az-ın məlumatına görə, bu haqda Peşəkar Futbol Liqası saytı vasitəsi ilə açıqlama yayıb.

Futbolçular və rəhbərlik heyəti arasında xəsarət alanlar olsa da, həyatını itirən yoxdur. Bu fors-major hal nəzərə alınaraq, PFL tərəfindən bu günə nəzərdə tutulan “Şamaxı-2” - “Mingəçevir” görüşü təxirə salınıb.

Oyunun nə vaxt keçirilməsi ilə bağlı əlavə məlumat veriləcək.

***

APA-nın yaydığı xəbərə görə, “Mingəçevir” futbol komandasını daşıyan avtobus yük maşını ilə toqquşub. Hadisə günorta saatlarında, İsmayıllı-Şamaxı avtomobil yolunun Muğanlı ərazisindəki dolayda qeydə alınıb.

Sərnişin avtobusu ilə “KamAZ” markalı yük avtomobilinin toqquşması nəticəsində xeyli sayda xəsarət alanın olduğu bildirilir.

Xəsarət alanlar - yük maşınının sürücüsü, 1949-cu il təvəllüdlü Məmmədov Əflatun Abdulla oğlu və 1968-ci il təvəllüdlü Qarayev Zaur Ələş oğlu ("Migəçevir" klubunun idman direktoru) xəstəxanaya yerləşdirilib.