“Neftçi” üçün SOS

AFFA-da rəhbər dəyişikliyindən sonra Azərbaycan futbolunu faktiki olaraq Balakişi Qasımov-Maqsud Adıgözəlov tandeminin idarə etməsi hakim idarəçiliyinə də təsir edir. Ədalət qoruyucularının ədaləti deyil, “Sabah”ın mənafeyini qoruması halları ilə dəfələrlə rastlaşmışıq. “Sabah”ın marağına xidmət etməyənlər isə hakimlikdən uzaqlaşdırılmaq təhlükəsi ilə üz-üzə qalırlar. Daha əvvəl də xəbər verdiyimiz kimi, Azərbaycan kubokunun yarımfinal mərhələsinin “Neftçi” və “Sabah” komandaları arasında keçirilən ilk oyunundan sonra xoşagəlməz hal yaşanmışdı. Matç başa çatdıqdan sonra “Sabah”ın prezidenti, AFFA İcraiyyə Komitəsinin üzvü Maqsud Adıgözəlov görüşün baş hakimi Əliyar Ağayevi hakimlikdən uzaqlaşdırmaqla hədələmişdi.

Sonradan Adıgözəlov mətbuata açıqlamasında bunu təkzib etsə də, biz mənbəmizin etibarlılığına əminik. Əliyar Ağayevin həmin matçdan sonra bir neçə tur təyinat almaması da yazdıqlarımızın sübutu idi...

Sabah “Sabah” və “Neftçi” arasında kubokun yarımfinalının cavab matçı keçiriləcək. İndi məlum oldu ki, həmin görüş İnqilab Məmmədova həvalə olunub. O İnqilab Məmmədov ki, bu mövsüm bir neçə dəfə “Sabah”ın lehinə qalmaqallı qərarları ilə yadda qalıb. Çox düşünməyə ehtiyac yoxdur. 17-ci turdakı "Araz-Naxçıvan" - "Sabah" (0:1) və 22-ci turdakı "Sabah" - "Turan Tovuz" (2:1) matçları buna ən yaxşı misaldır. Və indi həmin İnqilab Məmmədovu gətirib təyin elədilər sabahkı "Sabah" - "Neftçi" oyununa... Bu, hansı məntiqə sığır? Hazırda ölkədə futbol üzrə 3 FİFA referisi var - Əliyar Ağayev, Elçin Məsiyev və Kamal Umudlu. Bu halda hansı əsasla bu cür taleyüklü görüş FİFA referilərinə tapşırılmır? Tamam, Əliyar Ağayev komandalar arasındakı ilk görüşü idarə edib deyə bu dəfə kənarda qaldı. Bu, anlaşılandır. Bəs Elçin Məsiyev? Məsiyev hazırda demək olar ki, ən yaxşı azərbaycanlı referidir. Bu halda nə üçün bu cür vacib qarşılaşma ona tapşırılmayıb? Tovuzda “Sabah”ın futbolçusuna layiqli qırmızı vərəqəni verdiyi üçün?..

Futbolxeber.az