Gündəmi dəyişən foto - QEYD

Ötən il mayın 11-də AFFA-nın sabiq baş katibi, hazırda FİFA-nın Avropa üzrə regional direktoru olan Elxan Məmmədov Azərbaycan Premyer Liqasının 34-cü turu çərçivəsində keçirilən “Araz-Naxçıvan” - “Turan-Tovuz” oyununa təşrif buyurmuşdu. Məmmədovun ani gəlişi, “CBC Sport” ekranlarında Azərbaycan Futzal Federasiyasının prezidenti Zaur Axundovla birgə görünməsi bir çoxlarını ciddi şəkildə narahat etmişdi.

Hətta Elxan Məmmədovun sələfi Sərxan Hacıyev sabiq rəhbərinin ekranda görünməsindən o qədər narahat olmuşdu ki, “CBC Sport” kanalının rəhbəri Volkan Üstə gileylənmişdi də: “Heç oyuna gələndə məni ekranda göstərmirsiniz. Ya da ancaq “tapış”la göstərirsiniz”...

Dünən Elxan Məmmədovun daha bir fotosu yayıldı və həmişəki kimi yenə gündəm oldu. Budəfəki fotoda Elxan Məmmədov AFFA-nın hazırkı baş katibi Cahangir Fərəcullayevlə birgə idi. Bu fotonun yaratdığı effekt, bəzilərinin yenidən narahatlığa qərq olması və s. bütün bunlar öz yerində. Məni maraqlandıran Sərxan Hacıyevin bu fotoya hansı reaksiya verməsidir. Görəsən, Sərxan müəllim budəfəki fotodan kimə şikayət edəcək? FİFA-nın prezidenti Canni İnfantinoya, yoxsa AFFA-nın rəhbəri Rövşən Nəcəfə? Necə deyərlər, keçmiş olsun, Sərxan müəllim...

Dünən yayılan foto həm də onu göstərdi ki, Elxan Məmmədovla AFFA-nın hazırkı rəhbərliyi arasında münasibətlər tam qaydasındadır. Başqa cür olduğunu düşünmək də düzgün çıxmaz. Çünki Elxan Məmmədov bu gün AFFA-nın da tabe olduğu FİFA-da rəhbər postlardan birini tutur. Sabah hansı vəzifədə olacağını isə zaman göstərəcək...

İbrahim Cəfərov