“Sabah” - “Kəpəz” oyunundan sonra dava - EKSKLÜZİV

Azərbaycan Premyer Liqasının XXIX turu çərçivəsində keçirilən “Sabah” - “Kəpəz” oyunundan sonra qalmaqal yaşanıb.

Futbolxeber.az saytına etibarlı mənbədən verilən məlumata görə, görüşdən sonra paytaxt klubunun baş icraçı direktoru Ramin Həsənov matçı idarə edən Rauf Cabbarovun üzərinə hücum çəkib. Əlbəyaxa olan tərəfləri yalnız digər hakimlər, eləcə də qarşılaşmanın hakim-inspektoru Anar Salmanov ayırıb. Baş hakimin idarəçiliyindən narazı qalan klub rəsmisi Cabbarovu hakim karyerasına son qoyacağı ilə bağlı hədələyib.

Xatırladaq ki, bu “Sabah”la bağlı ilk hakim qalmaqalı deyil. Daha əvvəl də yazdığımız kimi, paytaxt klubunun prezidenti Maqsud Adıgözəlov “Neftçi” ilə kubok oyunundan sonra Əliyar Ağayevi hakimlikdən uzaqlaşdıracağı ilə hədələyib.

Mənbəmizin sözlərinə görə, hakimlərin əksəri “Sabah” rəsmilərinin davranışından narazıdır. Vəziyyət o həddə çatıb ki, “Kəpəz”lə matçdan sonra yaşanan insidentə görə görüşün hakimlər briqadası, eləcə də matçın hakim-inspektoru olan Anar Salmanov “Sabah”dan AFFA Hakimlər Komitəsinə şikayət ediblər. Lakin bu gün AFFA-nı faktiki olaraq “Sabah” rəhbərliyinin idarə etdiyini nəzərə alsaq, assosiasiya tərəfindən hər hansı bir ölçü götürüləcəyi inandırıcı deyil.

Futbolxeber.az