AFFA-nın növbəti biabırçılığı: UEFA layihəsi çərçivəsində torsuz qapılar

Son zamanlar atdığı addımlarla tez-tez özünü gülünc vəziyyətə salan AFFA yenə də “fərqlənib”.

Futbolxeber.az-ın məlumatına görə, bu gün assosiasiyanın saytında “Seleksiya xarakterli oyun keçiriləcək” başlıqlı xəbər paylaşılıb. Xəbərdə qeyd olunub ki, Bakıda UEFA-nın Elit Məşq Layihəsi çərçivəsində seleksiya xarakterli təlim-məşq toplanışı keçirilir. Aprelin 15-dək davam edəcək toplanışda layihənin 6 regional məntəqəsindən seçilmiş 26 futbolçu və 8 məşqçi iştirak edir. O da vurğulanıb ki, təlim-məşq toplanışında UEFA-nın nümayəndəsi Milenko Acimoviç də iştirak edir.

Bütün bunlarla işimiz yox. Xəbərdə diqqəti çəkən bəzi fotolardır. Həmin fotoları aşağıda paylaşmışıq.

Diqqətlə baxanda görmək olur ki, UEFA-nın Elit Məşq Layihəsi çərçivəsində seleksiya xarakterli təlim-məşq toplanışında futbolçular torsuz qapılarla məşq edirlər. 26 futbolçu və 8 məşqçinin iştirak etdiyi layihədə toru olan qapı tapmaq müşkülə çevrilib. Görünür, torsuz qapılar da AFFA-nın “yeni kəşfidir”. Tamam, bu biabırçılıq baş verib. Deyək ki, kişinin başına iş gələr. Bəs bunu çəkib paylaşmağın adı nədir? Özünü camaata güldürmək? Belə çıxır ki, AFFA gülüş hədəfinə çevrilməkdən zövq alır... Nə deyirik ki, yorulmayasınız...

Futbolxeber.az