Azərbaycan futbolunun ümid yeri

Ehtiram Quliyev son illərdə Azərbaycan futboluna ən real töhfə verən şəxslərdən biridir. O, sadəcə “Turan Tovuz” üçün yox, ümumilikdə ölkə futbolu üçün sistemli, uzunmüddətli və strateji əhəmiyyət daşıyan addımlar atır. Bu adam bölgədə təlim-məşq bazası tikir, gənc futbolçular üçün şərait yaradır, azarkeş mədəniyyətini canlandırır, yerli oyunçulara güvənir və real layihələrlə futbolun gələcəyini qurur.

Bəs AFFA rəhbərliyi nə edir? Ölkənin futbol təsisatının başında duran, milyonlarla büdcəyə sahib olan AFFA rəhbərliyi – xüsusilə də Rövşən Nəcəfin komandasındakılar – hələ də yersiz intriqalar, cərimələr və boş hesabatlarla vaxt keçirir. Onlar bu gün Ehtiram Quliyevin başına dolanmalıdır! Belə bir adamın atdığı hər addımı dəstəkləmək əvəzinə, onun yoluna daş qoymaqla məşğuldurlar.

Məsələn, öz cibindən təlim-məşq bazası tikən bir iş adamına AFFA deməlidir: “Bu, bizim üçün qürurvericidir. İcazə ver, bazadakı meydançalardan birinin xərclərini biz qarşılayaq”. Çünki bu gün Ehtiram Quliyev AFFA-nın etməli olduğu işi təkbaşına görür. O, bu ölkənin futboluna nəfəs verir, ruh verir, gələcək qurur.

Əksinə, AFFA rəhbərliyi isə bu nəfəsi boğmaqla məşğuldur. Belə davam edə bilməz. AFFA rəhbərliyi dərhal öz mövqeyini və strategiyasını köklü şəkildə dəyişməlidir. Əks halda, bu qurum futbolun inkişafına yox, tənəzzülünə xidmət edən mexanizm olacaq.

TAĞI