Mustafa Dənizli: “Bunu mən yox, federasiya edəcək"

“Xəzər Lənkəran” klubunun baş məşqçisi Mustafa Dənizlinin müsahibəsi

- Azərbaycan Premyer Liqasında III dövrəyə yaxşı başladınız, ilk “üçlük”də qərarlaşan kollektivlərlə görüşlərdən ümumilikdə 7 xal topladınız. Lakin hesabat turunda evdə “Bakı”ya məğlub olmağınız bir qədər gözlənilməz oldu. Məğlubiyyətin səbəblərini təhlil etdiniz?

- Bunun üzərində çox dayanmağa, əlavə araşdırma aparmağa gərək yoxdur. Öz səviyyəmizə uyğun çıxış edə bilmədik. Potensialımızı ortaya qoymağı bacarmadıq.

- Yeni transfer Vyekoslav Tomiçi oynatmamağınız sırf limitlə bağlıdır?

- Bəli, əsas heyətdə 21 yaşadək 1 futbolçu olmalıdır. Biz də Orxan Sadıqlıya şans veririk.

- Belə başa düşdük ki, heyətlə bağlı sıxıntınız var?

- Sıxıntı yalnız yerli futbolçularla bağlıdır. Seçim imkanımız azdır.

- Üstəlik, “Bakı” ilə oyunda daha bir neçə yerli oyunçu zədə aldı...

- Rasim Ramaldanov “Neftçi” ilə matçda zədələnmişdi. Bu dəfə isə Rahid Əmirquliyev və Elnur Abdullayev sıradan çıxdılar.

- Növbəti turda AZAL-ın qonağı olacaqsınız. Bu komandanın oyununu izləmisiniz?

- Oyunlarına baxmışam. Yaxşı komandadır. Biz də hazırlıqlarımızı uyğun şəkildə davam etdiririk.

- Bir neçə gün öncə AFFA-da limit məsələsi müzakirə olundu. Siz necə bir təklif irəli sürdünüz?

- Bu toplantı mətbuata qapalı olduğu üçün oradakı müzakirələri açıqlaya bilmərəm. Bunu federasiya edəcək.