Renat Dadaşov: "Bukovina"nın təklifi və baş məşqçinin yanaşması məni razı saldı"

Azərbaycan millisinin hücumçusu Renat Dadaşov Ukraynanın "Bukovina" klubuna keçidindən danışıb.

Futbolxeber.az saytının məlumatına görə, 27 yaşlı forvard Ukrayna təmsilçisinin mətbuat xidmətinə açıqlamasında "Bukovina" variantı barədə məlumat aldığını diqqətə çatdırıb:

"Agentim mənə zəng edərək Ukraynadan təklif olduğunu və 'Bukovına'nın mənimlə maraqlandığını bildirdi. Bundan sonra klub haqqında məlumat toplamağa başladım. Rəhbərliklə danışdıqdan sonra bu komandaya qoşulmaq ideyası xoşuma gəldi. Baş məşqçinin iş üslubu, oyun modeli və klubun məni heyətində görmək istəyi qərarıma təsir etdi. Onların münasibətini görəndə bura gəlməyə yüz faiz əmin oldum və müqavilə imzaladım. Güclü rəqiblərə qarşı oynayarkən qazandığım təcrübəni "Bukovina"ya gətirmək və meydanda bu komandanın şərəfini qorumaq istəyirəm".

O, Ukrayna futbolu və Çernovtsı şəhəri barədə fikirlərini bölüşüb: "Bir il əvvəl Azərbaycan millisinin heyətində Ukraynaya qarşı oynayarkən 12 aydan sonra bu ölkəyə köçəcəyimi ağlıma gətirməzdim. Lakin futbolu elə buna görə sevirəm. Ukrayna çempionatının səviyyəsindən xəbərdaram, burada həmişə güclü klublar olub. Çernovtsı da çox gözəl şəhərdir və burada olmaqdan zövq alıram".

Milli üzvü əsas məqsədinin komandaya kömək etmək olduğunu vurğulayıb: "Hücumçuyam və işim qollar vurmaq, məhsuldar ötürmələr etməkdir. Azarkeşlərin dəstəyi bizim üçün düşündüklərindən də vacibdir. Onlar tribunadan enerjilərini verəndə, komanda daha çox qələbə qazanmağa qadirdir".

Qeyd edək ki, R.Dadaşov Ukrayna klubu ilə "1+1" illik müqavilə imzalayıb.