Elvin Bədəlov: “Qələbə seriyamızı Zirədə də davam etdirmək istəyirik”

“Neftçi”nin müdafiəçisi Elvin Bədəlovun Futbolxeber.az saytına müsahibəsi

- Azərbaycan Premyer Liqasının ikinci turunda “Araz-Naxçıvan”ı böyük hesabla məğlub etdiniz. 5:0-lıq qələbəni necə şərh edərdiniz?

- Oyuna yaxşı başladıq. İlk dəqiqələrdən pressinq tətbiq edirdik. Hücum ardınca hücum qurmuşduq. Evdə ilk oyunumuz idi. Ona görə də erkən qol vurmaq, fanatlarımızı sevindirmək istəyirdik. Bunu da bacardıq. 5:0-lıq qələbə qazandığımız üçün sevinirik.

- Sanki ikinci hissədə sakitləşdiniz...

- Bəli, ikinci hissə daha yaxşı oynaya bilərdik. Amma hesab bizi rahatlaşdırmışdı. Düzdür, fasilədə öz aramızda dedik ki, 4:0 öndə olsaq da, heç cür arxayınlaşmamalıyıq. Buna rəğmən, tam da istədiyimiz futbolu nümayiş etdirmədik. Hesab belə olanda istər-istəməz arxayınlaşırsan. Qol da buraxmadıq. Əsas odur ki, böyük hesablı qələbə qazandıq.

- Legioner limiti ləğv olunsa da, “Neftçi” ardıcıl iki turda meydana 5 yerli futbolçu ilə çıxır. Bu məqamı necə dəyərləndirirsiniz?

- Əslində, biz keçən mövsüm də əksər matçlarda belə çıxış edirdik. Yaxşı da oynayırdıq. Çoxlarının gözləmədiyi halda yekunda avrokuboklara da vəsiqə qazandıq. Bəlkə baş məşqçi buna görə yerlilərə üstünlük verir. Lakin sabah necə olacağını bilmirik. Bəlkə hansısa matçda meydanda cəmi 3, yaxud 1 yerli futbolçu oldu. Yəni hər şey mümkündür. Çünki hər oyun fərqlidir. Təki yerlilər yaxşı oynasın...

- Növbəti turda “Zirə”nin qonağı olacaqsınız. Həmin matçdan gözləntiləriniz nədir?

- Hazırlaşacağıq. “Zirə” əzəli rəqiblərimizdən sayılır. Səfərdə oynayacağıq. Bizi çətin qarşılaşma gözləyir. Mövsümə ardıcıl iki qələbə ilə start vermişik. Seriyamızı davam etdirmək istəyirik.

- Qeyd etdiyiniz kimi, komanda mövsümə yaxşı başlayıb. Demək olar ki, bu, “Neftçi” üçün son illərin ən yaxşı startıdır. Bu, komandanın iddiasını daha da artırır?

- Təki sonu yaxşı olsun (gülür). Mövsümə yaxşı başlayıb, yekunda titul qazanmasaq, bunun heç bir faydası olmayacaq. Ona görə də əsas odur ki, mövsümün sonunda istəyimizə çataq.