II Liqa klubları narazıdırlar - PFL prezidentinə müraciət olundu - ÖZƏL

II Liqa klubları onlara ayrılan maliyyə vəsaitinin azlığından narazıdırlar.

Futbolxeber.az saytının əldə etdiyi məlumata görə, bu səbəbdən də klublar Peşəkar Futbol Liqasının (PFL) prezidenti Elxan Səmədova müraciət ünvanlayıblar.

Müraciətə II Liqada yarışacaq 12 klubun hamısı – “Ağdaş”, “Ağstafa Gəncləri”, “Difai”, “Dinamo”, “Kür-Araz”, “Qaradağ-Lökbatan”, “Quba”, “Marafon”, “Sheki City”, “Şəmkir”, “Şirvan” və “Zəngəzur”un rəsmiləri imza atıblar.

Müraicətdə qeyd olunub ki, II Liqa klublarına ayrılan aylıq 5 800, illik 58 000 manat çox azdır. Bu məbləğ xərcləri qarşılamağa kifayət etmir. Vurğulanıb ki, bu məbləğdə ayda minimum iki səfər oyununun nəqliyyat və qidalanma xərclərini, futbolçuların məvaciblərini, oyunlar və məşqlərə görə stadion ödənişlərini qarşılamaq mümkün deyil. Məvaciblərin cüzi olması səbəbində əksər futbolçular II Liqaya gəlməkdən imtina edirlər. Bir sözlə, klubların maddi vəziyyəti çox pisdir.

Üstəlik, aşağı liqa ilə, Premyer Liqa klublarına ayrılan maliyyə yardımı arasındakı fərq azmış kimi, I və II Liqa klubları FİFA və UEFA-dan gələn vəsaitlərdən də kənar qalırlar. Bu isə klubların maddi durumu arasındakı uçurumu daha da dərinləşdirir.

Klublar PFL prezidentinə müraciət edərək, bütün bu məsələlərin AFFA-nın İcraiyyə Komitəsinin növbəti iclasında qaldırılmasını Elxan Səmədovdan xahiş ediblər.