“Qarabağ” hələ tam hazır deyil, amma çox təhlükəlidir”

Belaruslu mütəxəssis Oleq Dulub UEFA Konfrans Liqasının 3-cü təsnifat mərhələsində “Dinamo”nun (Kiyev) “Qarabağ”a 1:0 hesabı ilə qalib gəldiyi ilk oyunu şərh edib.

Futbolxeber.az saytının məlumatına görə, bu barədə “Ukrainskiy futbol” nəşrinə danışan LNZ, “Çernomorets”, “Karpatı”nın sabiq baş məşqçisi bildirib ki, Bakıdakı cavab görüşündə “Dinamo”nu çətin sınaq gözləyir:

“Açığı, təəssüratlar kifayət qədər müsbətdir. Amma Nikolay Şaparenko iki qol imkanını dəyərləndirsəydi, hər şeyi həll etmək olardı. Məncə, bu oyunun gedişində 2:0 hesabı “Dinamo”nun növbəti mərhələyə yüksəlməsi üçün tam kifayət edərdi”.

O, Bakıdakı cavab matçı barədə deyib: “Orada onları kifayət qədər yaxşı komanda gözləyir. Amma hazırda “Qarabağ” hələ bir qədər "çiy"dir. Görünür ki, komandanın oyun əlaqələri çatışmır, mexanizmlər tam oturuşmayıb. Futbolçular yüksək səviyyəlidirlər, amma vəziyyət hələlik belədir. “Qarabağ”ın heyətində çoxlu yeni oyunçu var. Bununla belə, həm komandada qalan, həm də transfer olunan futbolçuların səviyyəsi kifayət qədər yüksəkdir.

Üstəlik, Lyublində meydança çox sürətli və keyfiyyətli idi. Texnikalı futbolçular üçün bu, ideal şəraitdir. Onların topla davranışı, xətlər arasına şaquli ötürmələr axtarması... Bu, kifayət qədər ciddi rəqibdir və “Dinamo”nun ilk oyunda qalib gəlməsi çox yaxşı oldu. Bu qələbə daha çox “Dinamo”ya lazım idi. Topa sahibolma faizinə baxsaq, üstünlük “Qarabağ”ın tərəfində idi. Amma yaradılan qol epizodlarına görə “Dinamo” öndə idi. Xüsusilə də oyunun sonlarında: əvvəlcə Şaparenkonun qapıçı ilə təkbətək çıxışı oldu, sonra isə “Dinamo”nun sol cinah oyunçusunun Ponomarenkoya ötürməsi, onun topu geri qaytarması, lakin mərkəz müdafiəçisinin ötürməni kəsməsi epizodu yaşandı. Əgər həmin ötürmə ünvanına çatsaydı, daha bir təkbətək vəziyyət yaranacaqdı”.