Ədalətin qələbəsi

Uzun müddətdir maraqla gözlənilən Peşəkar Futbol Liqasının (PFL) prezident seçkiləri nəhayət ki, baş tutdu. Ona qarşı yaradılan bütün süni maneələrə baxmayaraq, Elxan Səmədov layiqli şəkildə yenidən qurumun rəhbəri seçildi.

Əslində, normal şərtlər altında Səmədovun seçkidə qalib olacağı heç kimdə şübhə doğurmurdu. Çünki son 4 ildə Peşəkar Futbol Liqasının (PFL) gördüyü işlər göz önündədir. Səmədovun rəhbərliyi altında PFL məhdud büdcə və kollektivlə başqalarının on milyonlarla pul xərcləyib görə bilmədiyi işləri görür. PFL bu gün Azərbaycan Premyer Liqasını, I, II, Əvəzedicilər Liqasını və Azərbaycan kubokunu yüksək səviyyədə təşkil edir. Təbii ki, çatışmazlıq da var. Bunu heç kim inkar etmir. Xüsusən stadionlarla bağlı problem bəzən PFL-in işini çətinə salır. Lakin hər kəsə məlumdur ki, problemlərin kökü bu qurumdan qaynaqlanmır.

Futbol ictimaiyyətinin əksəri Elxan Səmədovun yenidən PFL prezidenti seçilməsini arzulasa da, ona qarşı olanlar da var idi. Gah Azərbaycan Premyer Liqasında iştirak edən klubların sifariş vərəqəsində yer alan legioner futbolçular üzrə ödənilən rüsumlar hesabına formalaşan bonus fondu ilə bağlı açıqlanan rəqəmlərə mız qoyuldu, gah qurumun keçirəcəyi tədbirə mane olmaq üçün son anda sponsor imtinası gəldi, gah da PFL-də yeyinti olması ilə bağlı şayiələr ortaya atıldı. Bütün bu “səylərə” baxmayaraq, yekunda haqq-ədalət yerini tapdı.

Odur ki, Elxan Səmədovun qələbəsi həm də ədalətin qələbəsidir. Səmədov bəziləri kimi vəzifəyə gəldiyi ilk gündən boş-boş vədlər vermədi. İşini əməldə göstərdi. Hətta 3 il əvvəl baş verən arzuolunmaz qəza belə Səmədovun səlahiyyətlərini icra etməsinə mane ola bilmədi. Elə oldu ki, Elxan bəy əməkdaşları ilə xəstəxana palatalarında iclas keçirdi. Amma bütün bunlar onun işinin öhdəsindən gəlməsinə mane ola bilmədi.

Təbii ki, bu qədər əziyyət yerdə qala bilməzdi. Əbəs yerə deməyiblər ki, bəndə kimdir ki, Allahın istədiyinə mane olsun... Səmədovun layiqli qələbəsi haqda, formalaşdırdığı mükəmməl kollektiv barədə saatlarla danışmaq, yazmaq olar. Lakin yuxarıda qeyd etdiyimiz kimi, Elxan Səmədov bəziləri kimi boş vədlər vermir, işini əməldə göstərir. İnanırıq ki, ötən 4 ildə olduğu kimi, qarşıdakı 4 ildə də PFL işinin öhdəsindən layiqincə gələcək.

Uğurlar Elxan bəy, uğurlar PFL kollektivi!

İBRAHİM