Ruan Renato: “Səfər oyunundan öncə yaxşı nəticə əldə etdik”

“Gözlədiyimiz kimi, çox çətin, gərgin oyun alındı. Qarşılaşmanı bizim üçün çətinləşdirən amillərdən biri də rəqibin çempionatının davam etməsi idi. “Torpedo” fiziki cəhətdən bizdən yaxşı vəziyyətdə idi. Bunu bilirdik”.

Futbolxeber.az saytının məlumatına görə, bu sözləri “Zirə”nin müdafiəçisi Ruan Renato UEFA Konfrans Liqasının I təsnifat mərhələsinin ilk oyununda Kutaisi “Torpedo”sunu 3:0 hesabı ilə məğlub etdikləri oyun barədə danışarkən deyib.

O, cavab matçı öncəsi yaxşı nəticə əldə etdiklərini bildirib: “Oyun ərzində yaratdığımız qol fürsətlərindən yaxşı faydalandıq. Sona yaxın rəqib təzyiqi artırmışdı. Nə xoş bizə ki, rəqibin qol vurmasına imkan vermədik. Səfər oyunundan öncə yaxşı nəticə əldə etdik”.

Braziliyalı müdafiəçi qarşılaşmada dubl etməsindən də danışıb: “Təbii ki, müdafiəçi üçün bir oyunda iki qol vurmaq hər zaman gözlənilən olmur. Çünki bizin funksiyasımız ilk növbədə yaxşı müdafiə olunmaqdır. Nə xoş mənə ki, komandam üçün faydalı oldum və səfər öncəsi əlverişli nəticə qazandıq. Bunda komanda yoldaşlarımın da böyük rolu oldu. Yaxşı temp və intensivlik nümayiş etdirdik”.

Renato avrokuboklarda iştirakın onlar üçün gözlənilməz olduğunu vurğulayıb: “Mövsüm başa çatdıqdan sonra demək olar ki, hamımız istirahətə yollanmışdıq. Birdən deyildi ki, avrokuboklarda iştirak ehtimalımız var. Təbii ki, bu qərar hamımız üçün gözlənilməz oldu. Məşqçilərimizin verdiyi proqram sayəsində istirahət zamanı müəyyən qədər formada qalmağa çalışırdıq. Toparlana bildik. Məncə, ilk oyun üçün yaxşı nəticə oldu. Bu qələbə gələcəkdə çempionata köklənməyimiz baxımından da mühüm əhəmiyyət kəsb edir”.