Azərbaycan UEFA reytinqində neçəncidir?

Azərbaycan UEFA ölkə reytinqində xal hesabını artırıb.

Futbolxeber.az saytının məlumatına görə, bu, avrokubokların 1-ci təsnifat mərhələsində “Sabah”ın Çempionlar Liqasında TNS (Uels), “Zirə”nin isə Konfrans Liqasında “Torpedo” (Gürcüstan) üzərindəki qələbəsi sayəsində mümkün olub.

Bu oyunlardan sonra Azərbaycanın cari mövsümdəki əmsalı 0.500-ə yüksəlib.

Hazırda son 5 mövsümün nəticələrinə əsasən Azərbaycanın ümumi əmsalı isə 19.062-dir. Bu göstərici ilə ölkəmiz UEFA ölkə reytinqində 26-cı pillədə qərarlaşıb.

Qeyd edək ki, 25-ci sırada yer alan İsrailin 20,750 əmsalı var.

Bu gün keçiriləcək Avroliqanın “Qarabağ” - “Vestri” matçında Ağdam təmsilçisi müsbət nəticə qazansa, bu da ölkəmizin xal ehtiyatının artmasına səbəb olacaq. 

Qeyd edək ki, reytinqə əvvəlkitək İngiltərə (101,852 əmsal) başçılıq edir.