“Bakı” Zaqatala səfəri öncəsi son məşqinə çıxdı

İki gün sonra “Bakı” Azərbaycan Premyer Liqasının 20-ci turu çərçivəsində səfərdə “Simurq”la qarşılaşacaq. Futbolxeber.az-ın məlumatına görə, komanda bu gün səfəröncəsi son məşqini keçirib.

Saat 11:00-da yüngül qaçışla başlanan hazırlıq isinmə hərəkətləri ilə davam edib. Ardınca 4 qrupa bölünən oyunçular qısa məsafələrə sürətli yer ötürmələri üzərində çalışıb. Daha sonra baş məşqçi Milinko Pantiç yetirmələrini ikitərəfli oyunda sınaqdan keçirib. Meydanın yarı hissəsində şərti olaraq “yaşıllar” və “sarılar” arasında baş tutan mübarizədə ikincilər 10:5 hesabı ilə üstün olub. Sonda müxtəlif dartınma hərəkətlərini də icra edən futbolçular bununla paytaxtdakı son məşqini başa vurub.

Xatırladaq ki, zədəli olan Vadim Abdullayev hazırlıqda iştirak etməyib. Marius Pena isə meydanboyu qaçmaqla kifayətlənib.