Əlçatmaz baş katib

AFFA-nın baş katibi Cahangir Fərəcullayev vəzifəyə yeni keçərkən çoxları üçün tanış sima deyildi. Buna baxmayaraq, o, ilk gündən hər kəslə ünsiyyət qurmağa, futbolun incəliklərinə bələd olmağa, bu sahənin adamlarını daha yaxından tanımağa çalışırdı. Hər halda onunla təmasda olanlar belə deyirdilər. Futbol sahəsində yeni olduğu üçün fəaliyyətinin necə alınacağı sual altında idi. İlk gündən haqqında “yaxşı insandır” fikri daha çox səslənirdi. Elə mən də Cahangir bəyi yaxından tanımıram. Bu günə qədər bir dəfə ayaqüstü dəqiqə yarımlıq söhbətimiz olub, vəssəlam. Yəni açıq deyim ki, mən nə baş katibə yaxın jurnalistlərdənəm, nə “futbolxeber” assosiasiyanın sevimli saytlarından. Heç bəzi həmkarlardan fərqli olaraq baş katiblə nə “Starbucks”da kofe içmişik, nə də “Gloria jeans”də “italyanski soda”. Yəni Cahangir Fərəcullayev barədə təsəvvürüm yalnız eşitdiklərim və gördüklərimdir.

Gördüklərim odur ki, gəldiyi ilk gündən “işə sıfırdan başlamalıyıq” deyirdi, cümləsinin əvvəli də inkişaf strategiyası idi, sonu da. Gəl ki, inkişaf strategiyası yazılandan, təsdiqlənəndən sonra Cahangir bəy bu haqda nə danışıb, nə də ortaya iş qoyulub. Sanki strategiya ilə bağlı AFFA-nın məqsədi, hədəfi sadəcə onu yazdırmaq, belçikalılara külli miqdarda vəsait ödəmək idi, vəssəlam. Strategiyada yazılanları isə heç kim reallaşdırmaq, həyata keçirmək barədə düşünmür. Uzun sözün qısası, görünən odur ki, baş katib kimi Cahangir bəy heç nə ilə yadda qalmayıb.

Son zamanlar isə baş katib yeni iddiaya düşüb. Bilmirəm, bu, Cahangir bəyin öz fikridir, ya ətrafdan kimsə ona məsləhət görüb, amma fakt budur ki, Fərəcullayev qərar qəbul edib ki, AFFA-nın baş katibi əlçatmaz olmalıdır. Bəli, səhv oxumadınız, həqiqətən də əlçatmaz. Yəni heç kim birbaşa Cahangir bəyə çıxa, dərdini, sözünü deyə bilməz. Kimin nəsə sözü varsa, yalnız vəzifəcə özündən aşağılar vasitəsi ilə baş katibə çatdırılmalıdır. Baş katiblə birbaşa ünsiyyət qurmaq olmaz. İngilislər demiş, it is impossible (yəni mümkün deyil).

Halbuki AFFA-nın baş katibi əlçatmaz olmalı deyil. Bu günə qədər o vəzifədə ən çox çalışan, hətta çoxlarının soyuq şəxs kimi təqdim etdiyi Elxan Məmmədov belə əlçatmaz olmayıb. Görəsən, Cahangir bəy niyə bu cür fikrə düşüb? Baş katib axı niyə əlçatmaz olmalıdır? Futbol adamları bəs dərdlərini, sərlərini, sözlərini kimə desinlər? Baş katib özünü əlçatmaz elan etdikdən sonra mətbuatdan da uzaq gəzir. Görəsən, baş katib sonuncu dəfə ümumi media bir yana, dostu olan jurnalistlərə nə vaxt müsahibə verib? Milli komandamızın sonuncu Avstriya toplanışında da Fərəcullayevin müsahibəsinə rast gəlmədik. Bir sözlə, baş katibin əlçatmazlıq eşqi mətbuatdan da yan keçməyib...

İBRAHİM