Sevgi kimi forma...

“Əfsanələrimizlə birgə əfsanəvi zolaqlı formaya geri döndük!” Dünən “Neftçi”nin sosial şəbəkə hesablarında bu anonsu görəndə azarkeşlər kimi, mən də səbirsizliklə yeni formanın təqdimatını gözlədim. 

Az sonra “Neftçi” yeni mövsüm üçün əsas formasını təqdim etdi. Formanı bir sözlə ifadə etməli olsaq, sadəcə, möhtəşəmdir deyə bilərik. Təsadüfi deyil ki, bəlkə “Neftçi”nin sosial şəbəkə hesablarının tarixində ilk dəfə idi ki, hər hansı paylaşıma gələn şərhlərin hamısı müsbət idi. Bircə neqativ rəyin belə olmamasını “Neftçi”nin nöqtə atışı saymaq olar.

Hələ anons videosunu izləyərkən özlüyümdə “bu haqda mütləq yazacağam” dedim. Amma sağ olsun “Neftçi”nin mətbuat xidməti, formanın təqdimatını elə etdilər ki, bu haqda yazmaq istəyənə söz qalmadı. Amma necə deyərlər, axtaran gərək nəsə tapsın...

Əvvəla, ondan başlayaq ki, anons videosunda həqiqətən də əfsanələrin yer alması alqışalayiq idi. Könül istərdi ki, həmin əfsanələr arasında “Qızıl oğlan” da olsun, amma həyatda hər istədiyimiz olsaydı, nə var idi ki...

“Əfsanə zolaqlı” adını daşıyan 2026/27 mövsümünün ev oyun dəsti, “Neftçi”nin 90 illik tarixinə ehtiram əlaməti olaraq, klubun əfsanəvi ağ-qara zolaqlarını yenidən meydanlara qaytarır.

Həqiqətən də mənim kimi, yaşı 40 civarında olanlar üçün “Neftçi” topu deyiləndə göz önünə ağ-qara top gəldiyi kimi, “Neftçi” forması deyəndə də məhz zolaqlı ağ-qara forma gəlir. Təsadüfi deyil ki, bu, klub tarixində ən çox istifadə olunan ev formasıdır. 

“Kappa” tərəfindən eksklüziv olaraq “Neftçi” üçün hazırlanan formada flaqmanın 90 illik yubileyinə həsr olunmuş xüsusi loqo da yer alır. Klubun paylaşımında deyildiyi kimi, “Bu detal klubun şanlı tarixini, nəsilləri birləşdirən irsini və yubiley mövsümünün ruhunu əks etdirərək formaya xüsusi məna qazandırır”.

Nəsillər demişkən, “Neftçi” çoxları üçün bir klubdan artıqdır. “Neftçi” bizə atalarımızın, babalarımızın mirasıdır. Atalarımız ilk dəfə əlimizdən tutub bizi məhz “Neftçi”nin oyunlarına aparıblar. Gözümüzü açandan Banişevski kimi əfsanənin adını eşitmişik. İllər keçib, əfsanə saydıqlarımız dəyişib, bu gün “Neftçi”ni mənə sevdirən babam, atam həyatda yoxdur, amma “flaqman” var və hər zaman da olacaq. Eynən “Neftçi” sevgisi kimi. Bu gün qızım futboldan söz düşəndə “Neftçi”, “Neftçi”, “Neftçi” bizim çempion” oxuyursa (ümid edirəm digər klublar buna görə məndən inciməz-:), deməli, “ağ-qara”lı sevgi əbədidir, həqiqətən də nəsildən nəslə ötürülür.

Bu gün “Neftçi”nin ev oyunlarına az azarkeş gəlir. Yuri Vernidub “Neftçi” ilə yeni müqavilə imzaladıqdan sonra “Yeni mövsümdə tribunaları dolu görmək istərdim” deyirsə, deməli, düşünmək üçün əsas var. Amma istənilən halda, “Neftçi” bu gün sevilir. Özü də son 10 ildə cəmi 1 dəfə çempion olmasına, illərdir Avropada uğur qazana bilməməsinə, hətta əzəli rəqibi “Qarabağ”ın Avropada sözün həqiqi mənasında at oynatmasına baxmayaraq...

“Neftçi”nin yeni forması nostalji hisslər yaşadır. Bu gün klub saat mezanizmi kimi çalışır. Rəhbəri, idarəçisi, baş məşqçisi, futbolçusu, mətbuat xidməti ilə. Bu yeni forma da mükəmməl işin növbəti nəticəsidir. Amma bütün bunların qarşılığı olmalıdır. Hörmətli “Neftçi” azarkeşi, bu əməyin qarşılığını sevginlə, tribunadakı yerini almaqla vermək zamanıdır. 

“Neftçi”nin paylaşımında deyildiyi kimi, “Nəsillər dəyişir, stadionlar dəyişir, amma dəyişməyən bir şey qalır - kimliyimiz. O, “Neftçi” üçün irsdir, xarakterdir, bir ömürlük sevgidir. Bu gün isə tarix yenidən öz rənglərinə qayıdır”. Bəli, tarix öz rənglərinə qayıtdığı kimi, “Neftçi” fanatı da öz yerinə - tribunaya qayıtmalıdır! Axı “Əfsanə zolaqlı” - dünənimiz, bu günümüz və sabahımızdır...

İBRAHİM