Bir təyinata sözardı - QEYD

Ceyhun Sultanov müstəqil Azərbaycan futbolunun ən tanınmış simalarından biridir. Dövrünün ən çox tələb olunan futbolçularından olub. “Neftçi”də, “Bakı”da, “Xəzər Lənkəran”da parlaq karyera yaşayıb. Xüsusən də son iki klubun qazandığı uğurlarda əsas pay sahibi olub. İstər “Bakı”nın, istərsə də “Xəzər Lənkəran”ın düşünən beyni idi. Təkcə meydanda deyil, meydandan kənarda da davranışı ilə bir çoxlarına nümunə olub.

Karyerasını başa vurduqdan sonra isə əksər keçmiş futbolçular kimi məşqçiliyi seçmədi. Əslində, belə olacağı hələ futbolçu vaxtından bilinirdi. Ceyhunun səlis nitqi, ünsiyyət qurmaq bacarığı, işgüzarlığı onun məşqçi yox, klub rəsmisi, idarəçi olacağına işarə idi. Belə də oldu. Karyerasını başa vurduqdan sonra “Sumqayıt”ın idman direktoru postunu tutdu. Düzdür, həmin vaxt “gənclik şəhəri”nin təmsilçisi yeni yaranmışdı və yalnız yerli futbolçularla mübarizə aparırdı, iddialı deyildi. Bununla belə, “Sumqayıt”ın bir klub kimi formalaşmasında, inkişafında Sultanovun payı var. Daha sonra Ceyhunun növbəti iş yeri “Keşlə” oldu. Bu klubda qısa müddət çalışmasına baxmayaraq, Sultanovun dövründə paytaxt klubu ölkə kubokunu qazandı, avrokuboklarda iştirak hüququ əldə etdi. Veteran futbolçunun növbəti ünvanı vaxtı ilə futbolçu kimi çıxış etdiyi, parladığı “Neftçi” oldu. Sultanovun buradakı işinin də uğurlu alındığını əminliklə söyləmək olar. Düzdür, “Neftçi” 9 ildən sonra çempion olarkən Sultanov artıq klubdan getmişdi, buna baxmayaraq, hər kəsə məlumdur ki, həmin komandanı məhz keçmiş idman direktoru yığmışdı. Yusuf Laval, Mamadu Kane, Sabiq Buqrin kimi çempionluqda böyük pay sahibi olan legionerlər məhz Sultanovun tapıntıları idi. “Ağ-qaralar”dan ayrıldıqdan sonra menecer kimi fəaliyyət göstərən Sultanov son 4-5 ildə bir çox keyfiyyətli legionerlərin Azərbaycana gəlişində pay sahibi olub. Özü də veteran futbolçunun əhatə dairəsi təkcə Azərbaycanla yekunlaşmır. Bu gün Qazaxıstan başda olmaqla daha bir neçə ölkənin klubları Sultanovun menecer xidmətindən faydalanırlar.  

Bu günlərdə isə Ceyhun Sultanovun yeni iş yeri müəyyənləşdi. Əslində, onun “Araz-Naxçıvan”ın prezidenti olacağı çoxdan gözlənilirdi. Lakin məsələ sənədləşmə səbəbindən bir qədər yubanırdı. Artıq bütün prosedurlar yerinə yetirilib və Sultanov Naxçıvan klubunun yeni prezidentidir. Təyinat açıqlanandan sonra çoxları bu addımı alqışlasa da, həmişə kimi, ağız büzənlər də tapıldı. Təbii ki, hər kəs fikrini ifadə etməklə sərbəstdir. Lakin həmişə “klublarda rəhbər vəzifədə futbol adamları çalışmalıdır” demirik? İndi nə oldu? Ceyhun Sultanovdan yaxşı futbol adamı? Bu təyinatın nəyi pisdir ki? Guya Sultanov menecerlikdən klub idarəçiliyinə gələn ilk şəxsdir? Onlarla belə nümunə göstərmək olar. Klub prezidentinin menecer kimi əlaqələrinin geniş olmasından “Araz-Naxçıvan” yalnız fayda götürə bilər. Ona görə də bu təyinatı sadəcə alqışlamaq lazımdır.

Naxçıvan Futbol Federasiyasının prezidenti Zaur Axundov uzun illərdir futzal, futboldadır. O, çalışdığı yerdə hər zaman uğur qazanıb. Axundov demək olar ki, kadr seçimində də heç vaxt yanılmayıb. Odur ki, Sultanovun təyinatının tam doğru olduğunu söyləmək mümkündür. Veteran futbolçunun təyinatına ağız büzmək ürək bulandırmaqdan başqa bir şey deyil...

İBRAHİM