“Qarabağ” milli üzvünün yolunu gözləyir?

“Qarabağ”ın maraq dairəsində olan futbolçulardan daha birinin adı müəyyənləşib.

Futbolxeber.az saytının məlumatına görə, Ağdam klubu yamaykalı Renaldo Sefasla maraqlanır.

Karyerasına vətənində başlayan 26 yaşlı vinger 2022-ci ildə “Şkupi”yə transfer olunub. 1 il ərzində Şimali Makedoniya təmsilçisinin heyətində o, 29 oyunda 11 dəfə fərqlənib. Sefas 2023-2025-ci illərdə “Ankaragücü”nün uğurları üçün çalışıb və paytaxt klubunda 58 oyunda 11 qol vurub.

Ötən yay isə Renaldo Sefas Rusiyanın “Pari NN” klubuna transfer olunub. Nijni-Novqorod klubunda yamaykalı futbolçu 25 matçda 1 dəfə qol sevinci yaşayıb.

2023-cü ildən dəvət aldığı Yamayka millisində isə 26 yaşlı vingerin aktivində 28 oyun və 3 qol var.

Renaldo Sefasın hazırkı klubu “Pari NN”lə hələ 2 illik müqaviləsi var. Bu səbəbdən də “Qarabağ” onu transfer etmək üçün Rusiya klubuna təzminat ödəməlidir.

Qeyd edək ki, Renaldo Sefas hələ ki Ağdam klubunun Avstriyadakı düşərgəsinə qoşulmayıb.