“Şəfa”da xaos: rəhbərliklə baş məşqçi arasında ciddi narazılıq yaranıb

Yeni mövsümdən Premyer Liqada çıxış edəcək “Şəfa”da vəziyyət çox qarışıqdır. Komanda Premyer Liqaya səs-küylə gəlsə də, deyəsən, iddiası elə kağız üzərində qalacaq. Xüsusən də Əfran İsmayılovun gəlişindən sonra klubda bir çox narazılıqlar yaranıb.

“Şəfa” Premyer Liqaya yüksələn kimi Əfran İsmayılov və Nadir Nəbiyev idarəçi, Zaur Həşimov isə baş məşqçi postuna gətirildi. Çox keçmədən artıq bu üçlük arasında ciddi narazılıq yaranıb. Belə ki, əvvəldən Nadir Nəbiyevə tapşırılan bəzi işlərin Əfran İsmayılovun nəzarətinə keçməsi birincinin ürəyincə olmayıb. Buna görə də artıq Nəbiyevlə İsmayılov arasında ciddi narazılıq yaranıb. İkili demək olar ki, bir-biri ilə danışmır.

Eyni xaotik vəziyyət baş məşqçi Zaur Həşimova da aiddir. Həşimovun mümkün transferləri Nadir Nəbiyevlə müzakirə etməməsi klub rəsmisinin narazılığına gətirib çıxarıb. Beləliklə, klubda hazırda Nadir Nəbiyev-Əfran İsmayılov-Zaur Həşimov üçlüyü arasında ciddi narazılıq hökm sürür. Vəziyyət o həddə çatıb ki, Həşimovun çempionat başlamamış baş məşqçi postunu tərk edə biləcəyi istisna edilmir.

Futbolxeber.az