Möcüzə adam

8 dekabr, 2025-ci il. “Neftçi” Masazırda “Sabah”ın qonağıdır. “Ağ-qaralar”ın yeni baş məşqçisi Yuri Vernidub oyunu tribunadan izləyir. Əslində izləməli bir şey də yoxdur. “Neftçi” meydanda konkret sürünür. Komandanın ifasında futbol adına heç nə yoxdur. İkinci hissədə “Neftçi” sadəcə topu irəli vurmaqla məşğuldur. Media tribunası ilə Vernidubun əyləşdiyi skayboks arasında məsafə uzaqdır. Amma ukraynalı mütəxəssisin qayğılı görüntüsü 50-60 metrdən də rahat sezilir. “Neftçi”nin vəziyyəti həqiqətən də ürəkaçan deyil. Düzü, könlünü “ağ-qaralar”a verənlərin də ümidləri böyük deyil. Adrian Mutu, Miodraq Bojoviç, Samir Abasov... Əksəriyyətin fikri belədir ki, bu siyahıya ən geci mövsümün sonunda Yuri Vernidub da qoşulacaq, yayda yenə komanda baş məşqçi axtarışına başlayacaq. Yenə 5-10 legioner göndəriləcək, əvəzinə yeni əcnəbilər cəlb olunacaq...

14 tur geridə qalıb, “Neftçi” cəmi 3 qələbə qazanıb, 15 xalla 9-cu pillədə qərarlaşıb. Komanda qol sayında yalnız turnir cədvəlinin son 4 pilləsində qərarlaşan “İmişli”, “Qəbələ”, “Kəpəz” və “Karvan-Yevlax”ı üstələyir. “Neftçi” 3-cü pillədəki “Zirə”dən 11 xal geri qalır. Uzun sözün qısası, “Neftçi”nin avrokuboklara vəsiqə qazanacağına, ilk dördlüyə düşəcəyinə ən optimist azarkeş də inanmır...

17 may, 2026-cı il. Kamal Umudlu final fitini səsləndirir. “Neftçi” “Sabah”ı 2:1 hesabı ilə məğlub edərək mövsümün sonuna 1 tur qalmış dördüncü yeri qarantiləyir. Bu, həm də UEFA Konfrans Liqasına vəsiqə deməkdir. Bu, “Neftçi”nin 3 illik həsrətinin sonu deməkdir. “Ağ-qaralar” Vernidub gələndə 11 xal geri qaldığı “Zirə”ni hazırda 3, 10 xal geri qaldığı “Sumqayıt”ı 15, 7 xal geri qaldığı “Araz-Naxçıvan”ı 13, 1 xal geri qaldığı “Şamaxı”nı isə 18 xal qabaqlayır. Bütün bunların yalnız bir adı var - MÖCÜZƏ! Mənə görə Yuri Vernidub həqiqətən də möcüzəni reallaşdırdı. Məsələ heç də nəticədə deyil. “Neftçi” futbol oynayır, futbol. İddialılar bir yana, “Neftçi” mövsümün əvvəlində qarşısında əziyyət çəkdiyi “İmişli”ni, “Şamaxı”nı bir ayaqla üstələyir. Breno Almeydanı çıxsaq, eyni heyət, eyni komanda. Bu nəticə həm də futbolda məşqçi amilinin nə dərəcədə əhəmiyyətli olduğunu göstərir.

Vernidubun böyüklüyü ondadır ki, gəldiyi ilk gündən bir dəfə də olsun heyətdən şikayətlənmədi. Bir dəfə də olsun dilindən “bu komandanı mən yığmamışam” cümləsini eşitmədik. Bu, yalnız şəxsiyyətlərə xas xüsusiyyətdir. Təkcə bu yox. Həm də dünənki açıqlamaları: “Klubun işçilərinə təşəkkür edirəm. Həkimlər, massajistlər, inzibatçılar əllərindən gələni edirdilər ki, biz oyunlara rahat hazırlaşaq, rahat dincələk, gücümüz yerində olsun. Bazada çalışan hər kəsə minnətdaram. Onların da bu uğurda rolları danılmazdır”. Düzünü deyin, bu günə qədər Azərbaycanda neçə məşqçi uğur qazanandan sonra bazada çalışanları yad edib? Hansı məşqçi sıravi xadiməni uğuruna şərik edib?.. Bu, böyüklüyün əlamətidir.

“Neftçi” azarkeşi səbirli olduğu qədər həm də uğura acdır. Onlar daha bir möcüzə gözləyirlər. Amma bu dəfə Avropada. Uğurlar, möcüzə adam. “Neftçi”ni “həyata qaytardınız”, indi isə flaqmanı Avropaya qaytarmağın vaxtıdır...

İBRAHİM