“Turan Tovuz”un qapıçısı: “Hakim bizi “öldürürdü”

“Turan Tovuz”un qapıçısı Sergey Samokun Futbolxeber.az saytına müsahibəsi

- Azərbaycan Premyer Liqasının 32-ci turunda səfərdə “Şamaxı”ya 2:3 hesabı ilə uduzdunuz. Məğlubiyyətə səbəb nə oldu?

- Oyuna çox pis başladıq. Bütün mübarizələri uduzduq. İki qol buraxdıq. Hakim səhvləri də var idi. Ümumiyyətlə, ilk hissədə hakim bizi “öldürürdü”. Başa düşə bilmirəm ki, necə belə oyun idarə etmək olar?

- Bununla belə, ikinci hissədə toplarlandınız.

- Bəli, fasilədən sonra daha motivasiyalı idik. Halbuki əvvəldən belə oynamaq lazım idi. İkinci 45 dəqiqədə iki qol vurduq, hesabı bərabərləşdirdik. Təəssüf ki, sonda yenə qapımızda qol gördük.

- “Şamaxı”nın üçüncü qolu bir qədər gözlənilməz oldu. Həmin anda nə baş verdi?

- Anlaşlmazlıq yarandı. Millerlə bir-birimizi başa düşmədik. Rəqib də bundan maksimum yararlandı.  

- Sona 1 tur qalmış üçüncü yeri tutacağınız dəqiqləşdi və UEFA Konfrans Liqasına vəsiqə qazandınız. “Turan Tovuz”un avrokuboklar perspektivini necə görürsünüz?

- Avrokuboklara vəsiqə qazandığımız üçün çox şadıq. Qarşıya qoyulan hədəfə çatdıq. Lakin indidən gələcək perspektiv barədə danışmaq tezdir. Yalnız onu deyə bilərəm ki, əlimizdən gələni edəcəyik, tam gücümüzlə mübarizə aparacağıq. Özümüzü Avropa arenasında da göstərməliyik. Çox istərdim ki, avrokuboklarda heç olmasa bir oyunumuzu Tovuzda, doğma azarkeşlərimiz önündə keçirək.

- Ümumilikdə, başa çatmaqda olan 2025/26 mövsümünü “Turan Tovuz” üçün necə dəyərləndirirsiniz?

- Çox yaxşı. Qarşıya qoyulan tapşırığın öhdəsindən gəldik. Komanda hədəfə çatdı. Düzdür, nəticəmiz daha da yaxşı ola bilərdi. Bəzi oyunlarda yersiz xallar itirdik. Lakin ümumi götürdükdə üçüncü yer də yaxşı nəticədir.

- Bəs limitin ləğvindən sonra çempionatın səviyyəsində fərq hiss olunur?

- Əlbəttə. Səviyyə ötən mövsümlə müqayisədə daha da artıb. Limitin ləğvindən sonra liqa güclənib. İstənilən komandaya qarşı mübarizə aparmaq çətinləşib.

- Sizi növbəti mövsümdə də “Turan Tovuz”da görə biləcəyik?

- İndidən nəsə demək çətindir. Məni burada hər şey qane edir. Çempionat bitdikdən sonra rəhbərliklə müzakirə aparacağıq.