Konfrans Liqası: “Neftçi” üçün 26 mümkün rəqibdən 11-i məlumdur

Azərbaycan Premyer Liqasında mövsümün başa çatmasına bir tur qalmış “Neftçi” dördüncü yeri təmin etməklə, həm də UEFA Konfrans Liqasına vəsiqəni rəsmiləşdirib.

Futbolxeber.az saytının haqqin.az-a istinadən verdiyi məlumata görə, “Neftçi” Konfrans Liqasına 1-ci təsnifat mərhələsindən başlayacaq. Bakı klubu 6.500 reytinq xalı ilə püşkatmada səpələnmişlər səbətində yer alacaq. Püşkatma iyunun 16-da keçiriləcək.

26 potensial rəqibdən 11-i artıq məlumdur. Bunlar “Styarnan” (İslandiya), “Europa” (Cəbəllütariq), “İnter” (Finlandiya), “Yelimay” (Qazaxıstan), “Hegelmann” (Litva), “Penibont” (Uels), “NSİ Runavik” (Farer adaları), “Glentoran” (Şimali İrlandiya), “Marsaşlokk” (Malta), “Nomme Kalju” (Estoniya), “Karnarvon Taun”dır (Uels).

Konfrans Liqasının 1-ci təsnifat mərhələsinin oyunları iyulun 9-u və 16-da keçiriləcək.

Xatırladaq ki, bu turnirdə Azərbaycanı “Turan Tovuz” da təmsil edəcək. Bürünc medalçı mübarizəyə 2-ci təsnifat mərhələsindən başlayacaq.