Yuri Vernidub: “Bu, bizim qələbələrimizin təminatçısıdır”

“Çox gözəl bir axşamdır. Şadam ki, qarşıya qoyulan hədəfə çatdıq”.

Futbolxeber.az saytının məlumatına görə, bu sözləri “Neftçi”nin baş məşqçisi Yuri Vernidub Azərbaycan Premyer Liqasının 32-ci turunda səfərdə “Sabah”ı 2:1 hesabı ilə məğlub etdikləri oyundan sonra deyib.

Ukraynalı mütəxəssis UEFA Konfrans Liqasına vəsiqə qazanmalarına belə münasibət bildirib: “Mən Bakıya gələndə qarşıma tapşırıq qoyulmuşdu ki, komanda avrokuboklarda iştirak edə bilsin. Bilirdim ki, dördüncü yerdən çox uzağıq. Lakin qarşıda hələ 19 tur var idi. 2025-ci ildə çempionatda iki oyun keçirdik. Daha sonra fasilə yarandı. Təlim-məşq toplanışına getdik. İmkan oldu ki, orada komandanı daha yaxından tanıyım. Toplanış müddətində əlimizdən gələni etdik. Bilirdik ki, məqsədə çatmaq çox çətindir. Buna baxmayaraq, oynamaq, daha da çox işləmək lazımdır. Belədə Allah da bizi mükafatlandıracaq. Deyə bilərəm ki, bu gün xoşbəxt bir insanam”.

O, “Neftçi”yə gəldikdən sonra əsas nələri dəyişdiniz?” sualını belə cavablandırıb: “İlk növbədə futbolçularla fərdi söhbətlər apardım. Hər bir oyunçu ilə təkbətək söhbətimiz oldu. Daha sonra biz intizamı öz yerinə oturtduq. Futbolçuları kifayət qədər yükləyirdik. Anlayırdıq ki, “Neftçi”yik, bütün oyunları “1 nömrə” kimi oynamalıyıq. Mən futbolçulara inandım, onlar da mənə. Bu inamın sayəsində yola davam etdik. Klubun işçilərinə təşəkkür edirəm. Həkimlər, massajistlər, inzibatçılar əllərindən gələni edirdilər ki, biz oyunlara rahat hazırlaşaq, rahat dincələk, gücümüz yerində olsun. Bazada çalışan hər kəsə minnətdaram. Onların da bu uğurda rolları danılmazdır. Xüsusi olaraq rəhbərliyə də minnətdaram. Ona görə təşəkkür edirəm ki, hər zaman yanımızda oldular, bizə dəstək verdilər, bütün istəklərimizi təmin etdilər. Futbolçu, məşqçi, rəhbərlik biryerdə olduq və bu, bizim qələbələrimizin təminatçısıdır”.

Vernidub “Neftçi”nin avrokuboklar perspektivi və heyətdəki mümkün dəyişikliklərdən də söz açıb: “Mən komandaya gələndə futbolçulara bəyan etdim ki, mövsümün sonuna kimi heç kimlə vidalaşmayacağıq. Heç kimi göndərmədik, öncədən verdiyimiz qərar idi. Bildirdik ki, mövsüm bitəndən sonra bu barədə müzakirə aparacağıq. Bəzi futbolçuların müqaviləsi bitir, bəziləri ilə davam edir. Avbrokuboklarda iştirak üçün komandaya yeni qan lazımdır. İstəməzdim Konfrans Liqası ilə ilk mərhələdə vidalaşaq. Avrokuboklar təcrübəm var. Bütün bunları nəzərə alaraq müvafiq qərarları verəcəyik, çox işimiz var, həddən artıq çox işləməliyik. Uğura gedən yol ancaq zəhmətdən keçir”.