Ramon Maçado: “Rəhbərlik bu il kluba çox pul xərcləsə də, təəssüf ki...”

“Araz-Naxçıvan”ın hücumçusu Ramon Maçadonun Futbolxeber.az saytına müsahibəsi

- Azərbaycan Premyer Liqasının 32-ci turunda “Kəpəz”i 2:0 hesabı ilə məğlub etdiniz. Görüşlə bağlı nə deyə bilərsiniz?

- Bizim üçün uğurlu oyun alındı. Yaxşı mübarizə apardıq. Hər iki hissədə üstünlük bizim tərəfimizdə idi. Layiqi qələbə qazandıq. Mən də fərqləndim. Uzun müddətdən sonra qol vurduğum üçün xoşbəxtəm.

- 6 oyunluq qələbə həsrətinə son qoydunuz...

- Təbii ki, uzun müddət qələbə qazanmamağımız heç də xoş deyildi. Nəhayət ki, bu matçda 3 xal qazandıq. Qalib gəlmək hər zaman xoşdur.

- Artıq avrokuboklara yollanmaq şansını itirmisiniz. Belədə oyunlara köklənmək çətin olmur?

- Digərlərini deyə bilmərəm, amma mən baxımdan hər hansı bir problem yoxdur. 100 faiz gücümü meydanda qoyuram. Sona qədər də belə olacaq.

- Maraqlıdır ki, “Kəpəz” “Qarabağ”, “Sabah” kimi klublara qalib gəlsə də, siz Gəncə klubunu bu mövsüm hər 3 oyunda məğlub etdiniz. Bunu nə ilə əlaqələndirmək olar?

- Futboldur, belə hallar olur. “Kəpəz” heç də zəif rəqib deyil. Onları asanlıqla məğlub etmək çətindir.

- “Araz-Naxçıvan”la müqaviləniz mövsümün sonunda bitir. Sözləşmənin artırılması ilə bağlı təklif almısınız?

- Xeyr, “Araz-Naxçıvan” mənə yeni müqavilə təklif etməyib. Bu barədə hər hansı söhbət olmayıb.

- Bəs digər klublardan maraqlanan olub?

- Müəyyən söhbətlər var. Lakin rəsmi olaraq heç bir təklif yoxdur.

- “Araz-Naxçıvan” mövsümə heç də pis başlamamışdı. Qış fasiləsinə qədər komanda iddiasını qoruyurdu. Sonradan nə baş verdi ki, uğursuzluq oldu?

- Təbii ki, bu vəziyyətə görə çox təəssüflənirəm. Bizim rəhbərlik bu il kluba çox pul xərclədi. Keçən ilə baxanda bu il daha çox şansımız var idi. Heyətimiz güclüdür. Bu heyətlə biz ilk dördlükdə olmalıydıq.

- Bəlkə çempionatda rəqabət artıb?

- Rəqabət daha yuxarıdır, razıyam. Lakin ilk növbədə günahı özümüzdə axtarmalıyıq. Bəzi matçlarda çox yersiz xallar itirdik.  

- Mövsümün son turunda “Zirə” ilə qarşılaşacaqsınız. Həmin matçdan gözləntiləriniz nədir?

- “Zirə” dördüncü yer uğrunda mübarizə aparır. Avrokuboklara yollanmaq şansları var. Buna görə də meydana qələbə üçün çıxacaqlar. Biz də ən yaxşısını etməyə çalışacağıq. Mən də komandama kömək etmək üçün əlimdən gələni edəcəyəm. “Araz-Naxçıvan”ın formasını geyirəmsə, 100 faiz özümü göstərməliyəm. “Zirə”yə qalib gəlməyə çalışacağıq.