“Karvan-Yevlax” rəhbərliyi nəyi gözləyir?

Bu gün Azərbaycan Premyer Liqasında 32-ci tura start veriləcək. Turun açılış matçında “Karvan-Yevlax” “Qəbələ”ni qəbul edəcək. Bir tur əvvəl qeydə alınan nəticələr fərqli olsaydı, bugünkü matç turun oyunu olardı. Gəl ki, “Karvan-Yevlax”ın “Neftçi”yə uduzması, “Qəbələ”nin isə “Qarabağ”dan xal alması ilə sona iki tur qalmış turnir cədvəlinin aşağı hissəsində mübarizə başa çatmış oldu. “Karvan-Yevlax” son 2 turun nəticələrindən asılı olmayaraq Premyer Liqa ilə vidalaşdı.

Əslində, real danışsaq, sonluğun belə olacağı gözlənilən idi. Çünki qış fasiləsinə qədər “Karvan-Yevlax” elə zəif çıxış etmişdi ki, komandanın liqada yerini qoruması möcüzə olardı. Müasir futbolda isə möcüzələr çox nadir hallarda olur. Komandanın heyətinin zəifliyi, yayda edilən yanlış seçimlər, legionerlərin səviyyəsinin digər klublarla müqayisədə zəif olması yekunda bu nəticəyə gətirib çıxardı. Düzdür, qış fasiləsindən sonra Füzuli Məmmədovun rəhbərliyi altında tam fərqli “Karvan-Yevlax” gördük.

Azarkeşlər də, mütəxəssislər də Məmmədovun gəlişindən sonra Yevlax klubunun daha yaxşı çıxış etdiyini təsdiqləyir. Qazanılan nəticələr də bunu sübut edir. Hər kəs “Karvan-Yevlax”ın üzərindən xətt çəksə də, Füzuli Məmmədovun komandası mübarizədən qopmadı. Ardıcıl qazanılan iki qələbə yevlaxlı azarkeşləri möcüzəyə ümidləndirmişdi. Gəl ki, alınmadı. Möcüzə baş vermədi. Hər halda Füzuli Məmmədov da əlindən gələni etdi. Amma hər halda 47 yaşlı mütəxəssisin də əlində sehrli çubuq yoxdur... Son illər mövsümün sonuna 6-7 tur qalmış Premyer Liqada düşəcək komandanın adı məlum olurdu. Gəl ki, yevlaxlılar liqaya rəng qatmağı, son iki tura qədər mübarizə aparmağı bacardılar. Lakin alınmayanda alınmır...

İndiki halda “Karvan-Yevlax” artıq növbəti mövsümün planlarını cızmalı, yenidən Premyer Liqaya qayıtmağın yollarını axtarmalıdır. Bunun üçün isə Füzuli Məmmədovla yola davam etmək, yayda mütəxəssisin istədiyi heyəti formalaşdırmaq lazımdır. Gəl ki, nədənsə klub rəhbərliyi hələlik gözləmə mövqeyi tutur. Kimi, nəyi gözləyirlər? Bu, anlaşılan deyil. Bəlkə “Karvan-Yevlax” yenidən Premyer Liqaya qayıtmaq istəmir? Əgər elədirsə, heç Füzuli Məmmədov da komandada qalmaz. Hər halda istər “Mingəçevir”dəki, istərsə də “Karvan-Yevlax”dakı işi ilə Məmmədov məşqçi kimi nəyə qadir olduğunu göstərib. Çətin ki, iddiasız “Karvan-Yevlax”da qalsın. Ona görə də yaxşı olardı ki, Yevlax klubunun rəhbərliyi bir qədər tələssin. Sonra gec ola bilər... Həm güclü, iddialı komanda qurmaq üçün, həm Füzuli Məmmədovu komandada saxlamaq üçün, həm də Premyer Liqaya qayıtmaq üçün...

İBRAHİM