Emil Balayev: “Neftçi” azarkeşləri həqiqətən də tribuna cədvəlinin liderləridirlər”

“Neftçi” həmişə meydanda dominantlıq etməyə çalışıb. Alınıb və ya alınmayıb, bu, başqa məsələdir. Bizim məqsədimiz həmişə eyni olub, qələbə qazanmaq. Gələcəkdə necə olacağını zaman göstərəcək. Amma biz ən yaxşısını etməyə çalışırıq”.

Futbolxeber.az saytına açıqlamasında bu sözləri “Neftçi”nin qapıçısı Emil Balayev deyib.

O, “Neftçi” azarkeşləri haqda müsbət fikirlər səsləndirib: “Qarabağ"a qarşı son məğlubiyyətdən sonra azarkeşlərin ikinci matçda da bizə dəstək olması komandamızı çox sevindiridi. “Neftçi” azarkeşləri həqiqətən də tribuna cədvəlinin liderləridirlər. Onlar bu banneri əbəs yerə açmamışdılar. Azarkeşlər də bizim istəyimizi bilirlər. Hər matçda meydana qələbə üçün çıxırıq. Fanatlar da sona qədər bizə güvənsinlər, dəstək olsunlar. Onların etimadını doğrultmağa çalışacağıq”.

“Qarşıdakı 4 oyundan ən çətini "Sabah"a qarşıdır. Onların çempionluğu təmin etməsi “Neftçi”nin işini asanlaşdırır?” sualını təcrübəli qolkiper belə cavablandırıb: “Xeyr. İnanmıram ki, hansısa futbolçumuzda belə düşüncə olsun. Rəqiblərin nə etməsinin bizim üçün fərqi yoxdur. Biz meydana çıxıb, üç xal üçün oynayacağıq. İşimizi maksimum dərəcədə yerinə yetirmək istəyirik”.