İmad Faraj: "Neftçi" 1:5 hesabı ilə uduza bilməz”

“Neftçi”nin vingeri İmad Farajın Futbolxeber.az saytına müsahibəsi

- Azərbaycan Premyer Liqasının 21-ci turundan təxirə salınmış oyunda “Qarabağ”ı 2:1 hesabı ilə məğlub etdiniz. Qələbəni necə şərh edərdiniz?

- Qələbə qazansaq da, çətin matç alındı. Ötən oyunda səhvlərimiz ucbatından 1:5 hesabı ilə uduzmuşduq. Ancaq ikinci görüşdə qələbə qazanacağımıza inanırdıq. Bu dəfə meydanda tam fərqli "Neftçi" gördünüz. Yaxşı mübarizə apardıq və layiqli qələbə qazandıq.

- 5 gün ərzində keçirilən 2 oyun arasında hansı fərqlər oldu?

- İlk görüşdəki məğlubiyyətdən sonra komanda yoldaşlarımızla paltardəyişmə otağında ciddi söhbət apardıq. Başa düşürük ki, "Neftçi" 1:5 hesabı ilə uduza bilməz. Biz bunu dərhal aradan qaldırmalıydıq, buna gücümüz çatır. Özümüzə söz verdik ki, ikinci oyunda qələbə qazanacağıq. Bildirdik ki, bunu edə bilərik, çünki qarşımızdakı "Barselona" deyil. Ötən matça nisbətdə bu dəfə daha sürətli idik. Vurduğumuz qollar da baxımlı alındı. Qol buraxsaq da, özümüz toparlayıb son dəqiqələrdə ikinci qolu vurduq.

- “Neftçi”nin avrokuboklara yollanmaq şansını necə dəyərləndirirsiniz?

- Qarşıdakı bütün matçlarda qələbə qazanmalıyıq.

- Sizcə, bu, nə dərəcədə realdır? Buna inanırsınız?

- İnam önəmlidir. “Qarabağ”la görüşdə də qələbə qazanacağımıza bir çoxları inanmırdı. 6 ay öncə də eşidirdim, deyirdilər ki, "Neftçi" "Qarabağ"la matçlarda geridönüş edə bilməz. Həmçinin mövsümün gedişində "Neftçi"nin ilk dördlüyə düşəcəyinə də inanmırdılar. Amma baxın, hazırda biz dördüncü yerdəyik.

- Növbəti matçda səfərdə "Karvan-Yevlax"la qarşılaşacaqsınız. Həmin qarşılaşmadan nə gözləyirsiniz?

- Çətin olacaq. İlk növbədə ona görə ki, süni ot örtüklü meydanda oynamaq olduqca ağırdır. Lakin bu barədə çox düşünməyə dəyməz. Biz daha əvvəl orada qələbə qazanmışıq. İnanırıq ki, bu dəfə də meydandan 3 xalla ayrılacağıq.

Azad Nuriyev