Ayxan Abbasov AFFA-nın “sirri”ni açıqladı: “Yay toplanışından sonra...”

Fernandu Santuşun istefaya göndərilməsindən sonra milli komandamız U-21-in baş məşqçisi Ayxan Abbasova tapşırıldı. Lakin nə həmin vaxt, nə də sonra assosiasiya mütəxəssisin müqavilə müddətini açıqladı. Bilinmədi ki, Ayxan Abbasov milli komandamızın müvəqqəti baş məşqçisidir, yoxsa komanda uzun müddətə ona tapşırılıb.

Mütəxəssis müsahibələrinin birində bu barədə suala cavabında qeyd edib ki, əsas yığmada U-21-dəki müqaviləsinə əsasən çalışır. Əgər həqiqətən də belədirsə, bu özü də normal hal deyil. Əsas yığmanın baş məşqçisi necə U-21-dəki sözləşməsinə əsasən çalışa bilər? Hər şey bir kənara, ən azından istənilən ölkədə əsas milli ilə gənclər yığmasının baş məşqçisinin müqavilə şərtləri, məvacibi və s. fərqli olur. Gəl ki, AFFA bu məsələdə anlaşılmaz mövqe nümayiş etdirərək bu günə qədər Ayxan Abbasovun müqaviləsini, sözləşmənin detallarını “sirr” olaraq saxlayır.

Nəhayət, bu gün Ayxan Abbasov özü bu “sirri” açdı. Belə ki, “FIFA Series - 2026” beynəlxalq turniri çərçivəsində sabah Azərbaycan - Syerra Leone oyunu öncəsi təşkil olunan mətbuat konfransında Futbolxeber.az saytının əməkdaşı Ayxan Abbasova bu barədə sual ünvanlayıb. Mütəxəssis cavabında bildirib ki, müqaviləsi ilin sonuna kimidir:

“Şamaxı” ilə müqaviləmiz yayda bitir. Milli ilə də danışığımız olmuşdu ki, yay toplanışından sonra bütün mövzuları müzakirə edəcəyik. İlin sonuna qədər müqaviləm var”.