“Milliyə dəvət almağımda “Turan Tovuz”un məşqçilər korpusunun böyük əməyi var”

“Qəbələ” ilə oyun çətin keçdi. İlk hissə bizim üçün bir qədər uğursuz alındı. Heç cür toparlana bilmirdik. İkinci hissəyə isə daha motivasiyalı çıxdıq. Çalışdıq vəziyyəti dəyişək və yekunda vacib qələbə qazandıq”.

Futbolxeber.az saytına müsahibəsində bu sözləri “Turan Tovuz”un yarımmüdafiəçisi Ayxan Hüseynov Azərbaycan Premyer Liqasının 25-ci turunda “Qəbələ”yə 3:2 hesabı ilə qalib gəldikləri oyun barədə danışarkən deyib.

O, son 2 matçda qapılarında 3 qol görmələrini yorğunluqla əlaqələndirib: “Son 2 oyunda asan qollar buraxdıq. Bu da yorğunçuluqdan irəl gəlirdi. Son vaxtlar 4-5 gündən bir meydana çıxmalı olurduq. Yorğun idik. Bu məqam hələ “Kəpəz”lə oyunda da özünü göstərirdi. “Qəbələ” ilə matçda da isə iki lazımsız qol buraxdıq”.

26 yaşlı futbolçu rəqiblərin deyil, öz çıxışlarına fokuslandıqlarını qeyd edib: “Təbii ki, avrokuboklar yolunda rəqiblər güclüdür. “Neftçi” hazırda çox yaxşı formadadır. “Araz-Naxçıvan” da bizə yaxınlaşır. “Zirə” inamlı təsir bağışlayır. Lakin biz öz oyunumuza baxmalıyıq. İndiki məqamda əsas olan 6 xallıq üstünlüyü qorumaqdır”.

Hüseynov hər iki cəbhədə sona kimi mübarizə aparacaqlarını söyləyib: “Əsas Avropaya getməkdir. Buna çempionatdan, yaxud kubokdan getməyin heç bir fərqi yoxdur. Əlbəttə, kubok da bizim üçün vacibdir. Yarımfinala kimi gəlmişiksə, final da oynamaq istəyirik”.

“Turan Tovuz”un yarımmüdafiəçisi ilk dəfə milli komandamıza dəvət almasına belə münasibət bildirib: “Əvvəlcə keçirdiyim emosiyaları başa düşə bilmirdim. Qohumlar, tanışlar, dostlar zəng vurub təbrik edirdilər. Əlbəttə, yığmaya dəvət almaq sevindiricidir. Bunda “Turan Tovuz”un məşqçilər korpusunun böyük əməyi var. Şans verilsə, meydana çıxsam, millidə özümü yaxşı tərəfdən göstərmək üçün əlimdən gələni edəcəyəm. Təbii ki, mən də millinin əsas futbolçularından birinə çevrilmək istərdim”.