Litvanın 19 illik həsrətinə son qoyan U-19 millimiz - İnkişaf Strategiyasi budur?

19 yaşadək futbolçulardan ibarət milli komandamız dünən Avropa çempionatının seçmə mərhələsi çərçivəsində ilk oyununa çıxıb. Litva ilə qarşılaşan yığmamız meydanı darmadağınla tərk edib. Hər hissədə iki qol vuran litvalılar millimizi meydana çıxmağa peşman ediblər - 0:4. Bununla da, U-19 millimiz üçün seçmə mərhələ başlamamış bitdi. Qrupda 3 komandanın mübarizə apardığını, yalnız qrup qalibinin növbəti mərhələyə adladığını nəzərə alsaq, çətin ki, millimiz möcüzəyə imza ata...

Əlbəttə, futbolda udmaq da olar, uduzmaq da. Amma Litva kimi futbolu bizdən o qədər də seçilməyən ölkənin yığmasına 0:4 hesabı ilə uduzmaq biabırçılıqdır. İnanmırsınız? Gəlin tarixə birgə qısa səyahət edək. Görəsən, Litvanın U-19 millisi sonuncu dəfə nə vaxt bir oyunda 4 qol vurub? Kiçik bir araşdırma apardıq və məlum oldu ki, Litva yığması sonuncu dəfə bir oyunda 4 qolu 2007-ci ilin 25 oktyabrında vurub. Həmin gün San Marino ilə üz-üzə gələn Litvanın U-19 yığması 4:0 hesablı qələbə qazanıb. Geridə qalan illər ərzində seçmə mərhələ və yoxlama oyunları nəzərə alınmaqla 141 matça çıxan U-19 Litva millisi 23 qələbə qazanıb, 25 heç-heçə edib, 83 dəfə də uduzub. Vurulan qolların sayı 91, buraxılan qolların sayı isə 224-dür. Həmin 83 məğlubiyyətdən biri də məhz Azərbaycan yığması ilə görüşə təsadüf edir. Belə ki, 2016-cı ilin 9 oktyabrında U-19 millimiz Avropa çempionatının seçmə mərhələsi çərçivəsində litvalı həmyaşıdlarını 2:0 hesabı ilə məğlub edib. Qolları da Fərid Nəbiyev və Rövlan Muradov vurub. Son 10 ildəki nəticələr Litva və Azərbaycan futbollarında inkişafın hansı istiqamətdə getdiyini göstərir...  

Statistikadan da göründüyü kimi, Litva yığması millimizlə oyunda 19 ildən sonra 4 qol vurmağa müvəffəq olub. Maraqlıdır ki, Litvanın U-19 yığması sonuncu dəfə bir matçda 4 dəfə fərqlənəndə dünən meydanda olan futbolçulardan hələ heç biri dünyaya gəlməmişdi...

Ola bilər, biz nələrisə düzgün anlamırıq. AFFA-da rəhbər dəyişikliyindən sonra 1 il başımızı strategiya ilə qatanlar məhz bunu nəzərdə tuturmuşlar. Görünür, “inkişaf” belə olur. Litva kimi komandadan 4 qol buraxmaq...

P.S. Hörmətli, AFFA! Sabah U-17 millimiz seçmə mərhələdə Litva ilə üz-üzə gələcək. Xəbərçilik kimi çıxmasın, amma xəbəriniz olsun ki, Litvanın U-17 yığması sonuncu dəfə 4 qolu 2019-cu ilin 3 oktyabrında Farer adalarına vurub – 4:1. Görün neynirsiniz... Amma pisi odur ki, Litva yığması 2024-cü ildə Lixtenşteynə bir dəfə 9, bir dəfə 8, Estoniya millisinə isə 5 qol vurub... Allah millimizi qorusun!

İBRAHİM