Cavadovdan “Dinamo”ya dəstək

Bu gün II Liqanın 19-cu turu çərçivəsində “Dinamo” Binə qəsəbə stadionunda “Ağstafa Gəncləri”ni qəbul edib.

Futbolxeber.az saytının məlumatına görə, görüşü izləyənlər arasında Regional Futbol Federasiyaları İctimai Birliyinin prezidenti İsgəndər Cavadov da olub.

Məlum olduğu kimi, “Dinamo”nun əsasını klubun və İsgəndər Cavadov adına Bakı Futbol Akademiyasının yetirmələri təşkil edir.

Matçdan əvvəl komanda ilə görüşən İsgəndər Cavadov futbolçu və məşqçi heyətini Novruz bayramı münasibəti ilə təbrik edib və onlara uğurlar arzulayıb.

Qarşılaşma “Dinamo”nun 3:1 hesablı qələbəsi ilə başa çatıb. Matçda hesabı “Ağstafa Gəncləri” açsa da, tezliklə Yadigar Qarayev hesabı bərabərləşdirib. Daha sonra Valeh Seyidovun dublu “Dinamo”ya qələbə qazandırıb. Bununla da ardıcıl beşinci qələbəsini qazanan, xallarının sayını 28-ə çatdıran paytaxt təmsilçisi turnir cədvəlindəki mövqeyini bir qədər də yaxşılaşdırıb.

Matçdan sonra İsgəndər Cavadov “Dinamo”nun futbolçularını qələbə münasibəti ilə təbrik edib və qarşıdakı matçlarda da onlardan uğurlu nəticələr gözlədiyini bildirib.