AFFA 6 klubu cərimələdi

AFFA İntizam Komitəsinin növbəti iclası keçirilib.

Futbolxeber.az saytının məlumatına görə, iclasda II Liqanın 18-ci turunda baş verən qayda pozuntuları ilə bağlı da qərarlar verilib.

"Şəki Siti" - “Kür-Araz” oyununun 42-ci dəqiqəsində “Kür-Araz” komandasının 44 nömrəli futbolçusu Müseyib Abdullazadə təcavüzkar davranışa görə birbaşa qırmızı vərəqə aldığı üçün 3 oyunluq cəzalanıb, klub 300 manat cərimə edilib.

“Şəmkir” - “Araz Saatlı” oyununda “Şəmkir” komandasında 4 nəfər sarı vərəqə aldığı üçün klub 70 manat cərimə olunub. Oyunu bitdikdən sonra “Şəmkir” komandasının azarkeşləri tərəfindən pirotexniki vasitədən istifadə edildiyinə görə klub 300 manat cərimə edilib.

"Xankəndi" - “Ağdaş” oyunu “Ağdaş” komandasının meydançaya gec çıxması səbəbindən gec başladığına görə klub 300 manat cərimə edilib.

“Qaradağ Lökbatan” - “Göygöl” oyununda “Qaradağ Lökbatan” komandası təşkilati-texniki öhdəlikləri pozduğuna görə klub 100 manat cərimə edilib.

“Quba” - “Dinamo” oyununda “Quba” komandasının 4 futbolçusu sarı vərəqə aldığı üçün klub 70 manat cərimə edilib.

“Dinamo” isə 5 nəfər sarı vərəqə aldığı üçün 70 manat cərimə edilib. Matçın 53-cü dəqiqəsində “Dinamo” komandasının 11 nömrəli futbolçusu Fizuli Dəmirov ciddi qayda pozuntusuna görə birbaşa qırmızı vərəqə aldığı üçün 2 oyun oyunluq cəzalanıb, klub 100 manat cərimə olunub.