“Sumqayıt”ın dərdi nədir? - QEYD

Mövsümün əvvəlində Saşa İliçi baş məşqçi postuna gətirən “Sumqayıt” çempionata yaxşı start verdi. İlk turlar komanda liderlər sırasında idi. Ümumiyyətlə, qış fasiləsinə qədər bəzi matçlarda gözlənilməz xal itkiləri ilə üzləşsə də, “gənclik şəhəri”nin təmsilçisi 16 turdan sonra medala iddialı təsiri bağışlayırdı. Komanda qış fasiləsinə dördüncü yerdə yollandı və “Sumqayıt”ı üçüncü pillədəki “Zirə”dən cəmi 1 xal ayırırdı.

Komandanın bu uğurlu çıxışı mövsümün ikinci hissəsində də davam etdirməsi üçün rəhbərlik tərəfindən qış fasiləsi ilə bağlı bütün lazımi addımlar atıldı. Bəzi klublar qış toplanışını ölkə daxilində keçsə də, “Qarabağ” və “Zirə” kimi klublar cəmi 1 həftəlik Antalyaya yollansa da, “Sumqayıt” qardaş ölkədə 2 həftə oldu. Eləcə də heyətin gücləndirilməsi üçün lazımi addımlar atıldı. Milli komandamızın üzvü Emil Mustafayev və ukraynalı müdafiəçi Danilo

Beskorovaynıy Ukraynanın “Polissya” klubundan icarəyə götürüldü. Həmçinin Trnava “Spartak”ından Sedrik Badolo transfer olundu. Məlum məsələdir ki, qış transfer pəncərəsi zamanı yaxşı futbolçu tapmaq çətindir. Buna baxmayaraq, “Sumqayıt” heyətini gücləndirə bildi. Danilo

Beskorovaynıy demək olar ki, gəldiyi ilk gündən müdafiənin mərkəzində əsas heyət üzvünə çevrilib. Emil Mustafayevin nəyə qadir olduğu məlumdur. O ki qaldı Sedrik Badoloya, açığı, “Sumqayıt” rəhbərliyinin bu hücumçunu necə razı saldıqları çox maraqlıdır. Çünki Burkina Faso millisinin üzvü olan 26 yaşlı futbolçu “Şerif”in heyətindəki parlaq çıxışı ilə adından söz etdirib. Onun üçün Avropada klub tapmaq çox asandır.

Bir sözlə, “Sumqayıt” qış fasiləsindən lazımınca yararlansa da, mövsümün ikinci hissəsində nəticələr yaxşılaşmaq əvəzinə daha da pisləşdi. Geridə qalan 7 tur ərzində komanda cəmi 1 qələbə qazanıb, 2 dəfə heç-heçə edib, 4 dəfə isə uduzub. 21 mümkün xaldan cəmi 5-i toplanıb. Eləcə də İliçin çalışdırdığı kollektiv 1/4 finalda “Zirə”yə uduzaraq ölkə kuboku ilə vidalaşıb. Bütün bu nəticələr isə komandanın avrokubok iddiasına ciddi zərbə vurub. Saşa İliç də hər oyundan sonra gah nala vurur, gah mıxa. Uğursuzluğun səbəblərini aşkarlayıb, çatışmazlıqları aradan qaldırmaq əvəzinə serb mütəxəssis ya transferlərlə bağlı sualı cavabsız qoyur, ya da strategiyanın dəyişdiyini bildirir.

Ümumiyyətlə, transfer məsələsində İliçin nədənsə narazı qalmağa haqqı varmı? Hansı komanda qış fasiləsində heyətini 3 lazımlı futbolçu ilə gücləndirib? Daha əvvəl də qeyd etdiyimiz kimi, əvvəla, qışda yaxşı futbolçu tapmaq çətindir. İkincisi də “Sumqayıt”ın büdcəsi 20-30 milyon deyil ki, heyətini 15-20 legionerlə gücləndirsin. Məhdud şəraitdə qışda 3 futbolçunun keçidi belə asan məsələ deyil. Lakin İliçin bu mövzuda suallardan yayınması oxların rəhbərliyə yönəlməsinə gətirib çıxarır... Halbuki bu gün Saşa İliçin “Sumqayıt” rəhbərliyindən narazı qalmaq üçün heç bir əsası yoxdur. Bunları deməklə bütün günahı məşqçinin üzərinə atmaq fikrində deyilik. Komanda uğursuz çıxış edirsə, bunda futbolçular da günahkardırlar. Onlar da məsuliyyətlərini dərk etməli, vəziyyəti dəyişməlidirlər. “Sumqayıt”ın son oyunlarına baxanda adam deməyə söz tapa bilmir. Sanki futbolçular göydə uçurlar, hərənin fikri bir yerdədir. İliç isə komandanı ayılda bilmir. Halbuki vəziyyət elə də faciəvi deyil. “Sumqayıt”ı hazırda 4-cü pillədən cəmi 7 xal geri qalır. Qarşıda isə 10 tur var və bu, 30 mümkün xal deməkdir. İliçin üzərinə düşən kollektivi silkələməkdir. O, bunu bacarmasa, böyük ehtimalla, “Sumqayıt”da fəaliyyəti 1 ildən artıq çəkməyəcək.

Yeri gəlmişkən, son günlər “Sumqayıt”ın uğursuz çıxışının fonunda sosial şəbəkələrdə, mətbuatda Samir Abasovun komandaya mümkün qayıdışı müzakirə olunur. Lakin əminliklə demək olar ki, bu, yalnız şayiədir. Hər halda Abasovun “Sumqayıt”dan son gedişi unudulmayıb. Ona görə də çətin ki, bu rəhbərlik olduğu müddətdə Abasov komandaya qayıtsın...

İBRAHİM