Ehtiram Quliyev: “Hazırkı büdcə ilə bu futbolu oynaya bilərik”

“Turan Tovuz”un İdarə Heyətinin sədri Ehtiram Quliyevin Futbolxeber.az saytına müsahibəsi

- Komandanız Azərbaycan Premyer Liqasının 23-cü turunda səfərdə “Neftçi” üzərində vacib qələbə (1:0) qazandı. Qarşılaşma barədə nə deyə bilərsiniz?

- Çətin oyun olacağını gözləyirdik. Qarşılaşma çox həyəcanlı alındı. Hər iki tərəf maraqlı oyun sərgilədi. Bütün azarkeşlərimizi təbrik edirəm. Əzmkar qələbə qazandıq. idi. Bu qələbə bizə hava-su kimi lazım idi. 3 xal qazandığımız üçün çox xoşbəxtəm.

- Demək olar ki, “Turan Tovuz” əmin addımlarla bürünc medala doğru gedir?

- Bəli, ən azı. Düzdür, mövsümün əvvəlində qarşımıza qoyduğumuz hədəflər tam bu deyildi. Qələbədən qələbəyə sevinirik, amma içimizdə itirdiyimiz xallara görə üzülürük. Addım-addım böyüyəcəyik. Hədəflərimizdən uzaqlaşmamışıq. Qarşıya qoyulan məqsədə riyazi cəhətdən hələ şansımız var. Bu şans davam etdikcə mübarizə aparacağıq. Onsuz da hədəfimiz sona qədər yarışın içində ola bilmək idi.

- Mövsümə çempionluq hədəfi ilə başladınız. Alınmasa, əsas məqsəd kuboku qazanmaq olacaq?

- Hədəfimiz yenə də çempionluqdur, dəyişməyib. O ki qaldı kuboka, indiki hədəf finala çıxmaqdır. Hər iki cəbhədə şanslarımız davam edir. Sona qədər mübarizə aparacağıq.

- Komandanız son 8 oyunda qapısını toxunulmaz saxlayıb. Halbuki bir ara “Turan Tovuz” müdafiə oyununa daha çox üstünlük verdiyi üçün tənqid olunurdu...

- Bizim oyunumuz budur. Büdcəmiz buna çatır. Hazırkı büdcə ilə bu futbolu oynaya bilərik. İndidən çempionatda neçənci olacağımızı deyə bilmərəm. Lakin plan da buna görə qurulmuşdu, baş məşqçi də buna görə seçilmişdi. Hədəf az büdcə ilə nəticə qazanmaqdır. Hər hansı bir dəyişiklik olmayıb. Geridə qalan müddətdə əldə olunan nəticələr bizi qane edir.

- Bu, Kurban Berdıyevin işindən razılığınızı ifadə edir?

- Əlbəttə. Berdıyevin işindən çox razıyam. Baş məşqçimizin arxasındayıq, nə olur olsun.

- Tovuz şəhər stadionun son durumu necədir? Martın 21-də “Qəbələ”yə qarşı keçiriləcək oyunu komanda öz meydanında keçirə biləcək?

- Xeyr, martın 21-dəki oyuna çata bilmirik. Lakin aprel ayında Premyer Liqadakı ilk ev oyunumuzu Tovuzda keçirəcəyik. Kubok matçı ilə bağlı indidən dəqiq bir söz demək çətindir. Bu məsələyə baxılacaq. Bu il bizim üçün çox çətin oldu. Komanda doğma stadiondan uzaq düşdü. Sanki hər şey əleyhimizə oldu. Biz nə vaxtsa bunu keçməliydik. Bu da bir mərhələ idi. Gələn il bizim üçün daha rahat olacaq.

İbrahim Cəfərov