Marko Yankoviç: “Bu, “Qarabağ” üçün son yox, yaxşı şansdır”

“Qarabağ”ın yarımmüdafiəçisi Marko Yankoviçin Futbolxeber.az saytına müsahibəsi

- Artıq bir neçə gündür məşqləri bərpa etmisiniz. Hazırlıqlar necə keçir?

- Toplanış yaxşı keçir. 1 həftə Bakıda hazırlıq keçdik. İndi də Antalyada toplanışımız davam edir. Hər şey yaxşıdır.

- Dünən toplanış çərçivəsində ilk hazırlıq matçına çıxdınız. Fərqanə “Neftçi”si üzərində qazanılan 5:0 hesablı qələbəni necə şərh edərdiniz?

- Hazırda 100 faiz hazır deyilik. Çünki məşqlərə təxminən 10 gündür başlamışıq. Buna baxmayaraq, gözəl oyun alındı. Yaxşı çıxış etdik. İlin ilk matçında gözəl qələbə oldu. İndi bu tempi saxlamalıyıq.

- Qarşıdan ilin ilk rəsmi matçı – Çempionlar Liqasında “Ayntraxt”la görüş gəlir. Frankfurt təmsilçisini rəqib kimi necə qiymətləndirirsiniz?

- “Ayntraxt” çox güclü komandadır. Onların üstünlüyü var. Bizimlə görüşə qədər 3 rəsmi oyun keçirəcəklər. Buna görə biz daha yaxşı çalışmalıyıq, daha hazır vəziyyətdə olmalıyıq.

- “Ayntraxt” 3 gün əvvəl Dortmund “Borussiya” ilə bərabərə qaldı (3:3). Həmin görüşü izlədiniz?

- Xeyr, açığı həmin görüşə tam baxa bilməmişəm. Onsuz da istənilən halda “Ayntraxt”ı tanıyırıq. Bilirik ki, Bundesliqa hansı səviyyədədir. “Ayntraxt” nəyə qadirdir. Heyətlərində kifayət qədər güclü futbolçular var. Bir sözlə, bizi çox çətin oyun gözləyir. 

- Bu görüşü “Qarabağ” üçün Çempionlar Liqasında son şans hesab etmək olar?

- Bu, son yox, yaxşı şansdır. Evdə oynayacağıq. İnanıram ki, azarkeşlərimiz də bizə həmişə kimi, əla dəstək verəcəklər. Onların dəstəyi ilə meydandan yaxşı nəticə ilə ayrıla bilərik. Lakin bunun üçün çox çalışmaq lazımdır.