“Ayın qolu”nun müəllifi: “Bilmirəm Premyer Liqada oynamağıma nə mane olur...”

I Liqada dekabr ayı üçün “Ayın qolu” layihəsinin qalibi, “Şahdağ-Qusar”ın hücumçusu Ruslan Voronsovun Futbolxeber.az saytına müsahibəsi

- Ayın qolu layihəsinin qalibi oldunuz. Namizədlər müəyyənləşərkən yəqin ki, digər qolları da izləmişdiniz. Qalib olacağınızı gözləyirdinizmi?

- Açıq deyim ki, vurulan 5 qolun hamısı biri-birindən gözəl idi. Ona görə də 50-nin 50-yə  qalmışdım. Düşünürdüm ki, seçilə də bilərəm, seçilməyə də. Ona görə qalib gəlməyim bir az sürpriz oldu.

- Siz 5 qolun 5-ini də qalib olmağa layiq bilsəniz də, 11 namizəddən 7-si məhz sizə səs verdi. Demək olar ki, bu cür inamlı qələbə sizin üçün sürpriz oldu?

- Səs verən münsiflər heyətinə təşəkkürümü bildirirəm. Sağ olsunlar. Dediyim kimi, belə açıq  fərqlə qalib seçiləcəyimi düşünmürdüm. Ona görə də həqiqətən də mənim üçün gözlənilməz oldu.

- Bəs seçim imkanı sizin əlinizdə olsaydı, 5 qoldan hansını ən yaxşı seçərdiniz?

- Seçim imkanı məndə olsaydı, Musa Musazadənin vurduğu qolu seçərdim. Həmin qol çox xoşuma  gəlmişdi. Mən ona səs verərdim.

- Mövsümün ilk hissəsini “Şahdağ-Qusar” üçün necə dəyərləndirsiniz?

- Əslində mövsümə yaxşı  başlamışdıq. Sonradan oyunçu çatışmazlığı ilə üzləşdik. Zədəli oyunçularımızın çox olması komandamıza mənfi təsir göstərdi. Üstəlik, bir çox futbolçumuz ilk  dəfə idi I Liqada oynayırdı. Bu da nəticələrdə özünü büruzə verdi. Sona yaxın toparlandıq. Mövsümün ilk dövrəsi çıxışımız əla olmasa da, nəticələrimizi ümumilikdə çox pis hesab etmir. I Liqanın debütantı olduğumuzu da unutmayaq.

- Hazırda “Şahdağ-Qusar”ın Premyer Liqaya yüksəlmək şansı real görünmür. Mövsümün ikinci hissəsi üçün komandanızın hədəfləri nə olacaq?

- İlk gündən də qarşımıza liqada qalmaq məqsədi qoyulub. Təbii ki, nə qədər yuxarı pillələrdə qərarlaşsaq, bir o qədər yaxşı olar. İnanırıq ki, qarşıya qoyulan tapşırığı yerinə yetirəcəyik.

- 7 qolla bombardirlər yarışında ikincisiniz. Qalib olmaq şansınızı necə dəyərləndirirsiniz?

- Düzdür, bombardir olmaq istəyirəm. Lakin bu, heç də asan olmayacaq. Çünki hazırda bombardirlər yarışında 11 qolla lider olan Seyxan Fərəcov demək olar ki, hər matçda fərqlənir, çox yaxşı formadadır. Əminəm ki, mövsümün ikinci hissəsində bombardirlik mübarizəsi də çox maraqlı keçəcək.

- I Liqada bütün komandalara qarşı oynamısınız. Premyer Liqaya yüksəlmək baxımından hansı komandanı daha şanslı görürsünüz?

- Əsas favoritlər “Şəfa”, “Səbail” və “Baku Sportinq”dir. Çempionluq mübarizəsi bu 3 klub arasında gedəcək. Adətən I Liqada hər şey qış fasiləsindən sonra aydın olur. Çünki əksər klublar qış fasiləsində güclənirlər. Ona görə də indidən kimin çempion olacağı bilinmir.

- Ötən mövsüm “Qəbələ” ilə I Liqada çempion olsanız da, sizi Premyer Liqada görə bilmədik. I Liqada son illər inamlı təsir bağışlayırsınız. Bəs daha irəli getməyə, Premyer Liqada forma geyməyinizə nə mane olur?

- Arzularımdan biri də Premyer Liqada oynamaqdır. Bilmirəm buna nə mane olur. Qismət... Sabah nə olacağını bilmək olmaz. Yenə də həvəsdən düşmürəm. Əlimdən gələni edirəm.

İBRAHİM