Elvin Bədəlov: “Qanundur, sən vurmursansa, sənə qol vuracaqlar”

“Neftçi”nin müdafiəçisi Elvin Bədəlovun Futbolxeber.az saytına müsahibəsi

- Azərbaycan Premyer Liqasının 15-ci turunda “Sumqayıt”a qarşı keçirilən matçda qələbəyə çox yaxın olsanız da, 1 xalla kifayətləndiniz. 2:2-lik heç-heçəni necə şərh edərdiniz?

- Gərgin oyun alındı. Heç nədən qələbəni əldən verdik. Oyuna çox yaxşı başladıq. 2 qol vurduq. Bəlkə də hesab arasındakı fərqi daha da artırsaydıq, rahatlıqla qalib gələrdik.

- 60-cı dəqiqədən sonra nə baş verdi ki, “Neftçi” meydanda dayandı?

- Dəqiq bilmirəm nə deyim. Qol şanslarımız var idi. Məncə, bu, elə qaçırılan şanslarla əlaqədardır. Fərqi artırsaydıq, daha rahat olardı.

- Kənardan belə görünür ki, “Neftçi” uduzmaqdan qorxur. Sanki hesabda öndə olanda belə, futbolçular nə etməli olduqlarını bilmirlər...

- Deməzdim ki, uduzmaq qorxusu var. Baş məşqçimiz də bizimlə söhbətində bildirdi ki, 60-70-ci dəqiqədən sonra temp düşdü. Bununla əlaqələndirdi. Şanslarımız oldu. Bu qanundur, sən qol vurmursansa, sənə vuracaqlar. Nə qədər yaxşı müdafiə olunsan da. Onlar da futbolçudur. Üstəlik, “Sumqayıt”ın heyətində çox güclü oyunçular var.

- Yuxarı pillələrlə xal fərqiniz artır. Avrokubok ümidi hələ ölməyib?

- Yox. Düzdür, təəssüf ki, xal fərqi artır. Amma ümidimiz ölməyib.

- Üstəlik, kubok da əldən çıxıb...

- Elədir. Üzərimizdə təzyiq var. Lakin inanırıq ki, vəziyyəti dəyişə bilərik. Belə oyunları udmaq lazımdır ki, yuxarı pillələrə yüksələk. “Sumqayıt”la matç göstərdi ki, vəziyyəti dəyişə bilərik. İnanıram ki, fasilədən sonra yaxşı toplanış keçib, mövsümün ikinci hissəsində hədəflərimizə çatacağıq.

- Vernidubun gəlişi “Neftçi”nin dərdinə dərman ola bilər? Nəzərə almaq lazımdır ki, bu təyinat heç də birmənalı qarşılanmayıb. Onun ikinci Qriqorçuk olacağını deyənlər də var...

- Qriqorçuku tanımıram. Vernidub xoş təəssürat yaratdı. Başqa məşqçidir. Özünü tələbləri var. Bizə inanır.  

- Vernidubun əvvəlki məşqçilərdən fərqi nədədir?

- Təbii ki, fərqi var. Ümumiyyətlə, hər məşqçinin öz baxışı olur.

- Konkretləşdirsək, fərq nədədir? Məsələn, məşqçi var topla oynamağa üstünlük verir, bir başqası üçün əsas oyun yox, nəticədir...

- Əvvəlki məşqçilər də topla oynamağımızı, hücumda rəqibimizi sıxmağı istəyirdilər. Eynən Vernidub da. Bu baxımdan istəkləri aşağı-yuxarı eynidir. Sadəcə bəzi detallar var, onları düzəltmək istəyir. Tələbkar məşqçidir, meydanda komanda kimi görsənməyimizi istəyir.

- Azarkeşlər heç olmasa mövsümün son oyununda 3 xala ümid edə bilər?

- “Karvan-Yevlax”la görüş ilin son oyunudur. Hədəf 3 xaldır. Mütləq qələbə qazanmalıyıq.

İbrahim Cəfərov