AFFA klubları soyur! - ARAŞDIRMA

Son zamanlar AFFA İntizam Komitəsi Premyer Liqa klublarına qarşı sərt cəzaları ilə seçilir. 5000 və ya 10000 manatlıq cərimələr sanki adi hala çevrilib. Bu məbləğlər imkanlı klubların büdcəsinə ciddi təsir etməsə də, əsasən dövlətin ayırdığı vəsaitlə ayaqda duran kollektivlər üçün böyük problemlər yaradır. Xüsusən də azarkeşlərlə bağlı cərimələrin sərtliyi ciddi narazılıq doğurur.  

Futbolxeber.az saytı AFFA İntizam Komitəsinin bu mövsüm Premyer Liqa klublarına verdiyi cəzalarla bağlı araşdırma aparıb.

Araşdırma nəticəsində məlum olub ki, cari mövsüm Premyer Liqada baş verən xoşagəlməz hallara görə klublar ümumilikdə 193 300 manat cərimə olunublar. 14 tur ərzində 82 qarşılaşma (2 matç baş tutmayıb) keçirildiyini nəzərə alsaq, bu, orta hesabla hər oyun üçün 2358 manat cərimə deməkdir.

İntizam Komitəsinin ən çox cəzalandırdığı klub “Neftçi”dir. Belə ki, 14 tur ərzində “ağ-qaralar” 72400 manat cərimə edilib. Bu, ümumi məbləğin 38 fazini təşkil edir. “Neftçi” cəza sıralamasında ən yaxın izləyicisini 3,7 dəfə qabaqlayır.

İntizam Komitəsinin ən az cəzalandırdığı klub isə “Zirə”dir. 14 tur ərzində qəsəbə təmsilçisi assosiasiyaya cəmi 2200 manat cərimə ödəyib.

14 tur ərzində klubların İntizam Komitəsinin cərimələrinə görə ödədiyi məbləğlər:

“Neftçi” - 72400

“Sumqayıt” - 19300

“Kəpəz” - 18600

“Karvan-Yevlax” - 16700

“İmişli” - 16400

“Sabah” - 15100

“Qarabağ” - 11000

“Şamaxı” - 7900

“Turan Tovuz” - 6900

 “Araz-Naxçıvan” - 4400

“Qəbələ” - 2400

“Zirə” - 2200

14 tur ərzində İntizam Komitəsinin ən böyük cəriməsi 10 min manatdır. 4 belə hal yaşanıb ki, bunlardan biri “Sabah”, biri “Sumqayıt”, ikisi isə “Neftçi” ilə bağlıdır. 3 dəfə məşqçilər 10 min manat həcmində cərimələnib ki, bu sırada “Sabah”ın məşqçisi, “Sumqayıt” və “Neftçi”nin baş məşqçiləri yer alıb. Daha bir dəfə isə “Neftçi” “Zirə” ilə görüşdə azarkeşlərin iğtişaş törətməsinə görə 10000 manat cərimə ödəməli olub.

Yuxarıda da qeyd etdiyimiz kimi, cari mövsüm xüsusən azarkeşlərlə bağlı cərimələr ciddi narazılıq yaradır. Azarkeşlərin rəqib futbolçular, yaxud hakimlər barədə səsləndirdiyi qeyri-etik şüarlar yekunda komandaların böyük məbləğdə cərimələnməsi ilə nəticələnir.

14 tur ərzində klublar azarkeşlərin davranışına görə ümumilikdə 92 min manat cərimələniblər. Bu, ümumi cərimə məbləğinin (193300 manat) təxminən yarısını - 48 faizini təşkil edir.

İntizam Komitəsinin azarkeşlərlə bağlı 92 minlik cərimə siyahısının əsas hissəsini rəqib komandaların və hakimlərin təhqir olunması təşkil edir. Belə ki, klublar ümumilikdə 55 min manat təhqirə görə, 10 min manat meydançaya yad/kənar əşya atılmasına görə, 10 min iğtişaş yaratmağa görə, 8 min manat oturacaqların sındırılmasına görə, 6 min manat pirotexniki vasitələrdən istifadəyə görə, 3 min manat isə ayrı-seçkiliyə görə cərimələniblər.

Azarkeşlərin davranışına görə 7 klub cərimə edilib. Fanatların ən çox xərcə saldığı klub “Neftçi”dir. “Ağ-qaralar” ümumilikdə azarkeşlərə görə 47500 manat cərimə ödəyib. Bu sıralamada ikinci yerdə 14 min manatla “Kəpəz”dir. Digər klublara gəldikdə isə fanatlar “Qarabağ”ı 11000 manat, “Karvan-Yevlax”ı 7000 manat, “Turan Tovuz” və “Sumqayıt”ın hər birini 5000 manat, “Araz-Naxçıvan”ı isə 2500 manat ziyana salıblar.

İbrahim Cəfərov