Şəkil çəkdirmək, boğazdan yuxarı sözlər və ... sıfır

Həftə sonu keçirilən Azərbaycan derbisinə – “Qarabağ” - “Neftçi” matçına maraq böyük idi. “Azərsun Arena”da anşlaq yaşanırdı. İstər azarkeşlər, istər media, istərsə də futbol ictimaiyyəti adına. Elə-belədə arenada 3-5 jurnalist olurdusa, bu dəfə media sektorda nəinki oturmağa, ayaqüstə dayanmağa belə yer tapmaq müşkülə çevrilmişdi. O ki qaldı futbol ictimaiyyətinə, açığı, AFFA-nın baş katibi Cahangir Fərəcullayevi arenada görmək sürpriz idi. Təbii ki, assosiasiyanın baş katibinin ölkə çempionatının matçına stadiondan canlı tamaşa etməsində qeyri-adi heç nə yoxdur. Sadəcə məsələ ondadır ki, baş katib çox nadir hallarda Premyer Liqa görüşlərini canlı olaraq stadiondan izləyir...

Bu il fevralın 2-də AFFA-nın baş katibi təyin olunan Fərəcullayev artıq 9 aydır iş başındadır. O, vəzifəyə təyin olunduğu gündən daha çox şəkil çəkdirməklə yadda qalırdı. Hansısa veteran futbolçunun ad günü olurdusa, dərhal AFFA-nın saytında baş katibin əlində mayka fotosu yayımlanırdı. Səhv etmirəmsə, C.Fərəcullayevin səsini media ilk dəfə təyinatından 2 ay sonra, AFFA-nın Hesabat Konfransında eşitdi. İnsafən, baş katib Konfransda çox gözəl çıxış etdi. “Hazırkı durumda hər şeyə sıfırdan başlamalıyıq”, “Uşaq futbolu yaralı yerimizdir”, “İnfrastruktur olmadan uşaq futbolu inkişaf etməyəcək”, “Biz sıfırdan ev tikməliyik” və s. Qulağa çox xoş gəlir, deyilmi? Lakin zaman keçdi, məlum oldu ki, bütün bunlar sadəcə boğazdan yuxarı sözlərdir. Ona görə ki, aylar keçib, lakin baş katibin yuxarıda dediklərindən hansısa biri istiqamətində müəyyən addımların atıldığını görməmişik. Deməli, bütün bunlar sadəcə publikanın gözündə xal qazanmağa hesablanmış açıqlamalardı.

Fərəcullayev bir də millinin İslandiya səfərində gündəmə gəldi. Oyundan əvvəl iddialı danışması ilə, matçdan sonra isə iki dəqiqənin içində milli komandanın baş məşqçisini vətən xaini çıxarmaqla. Fernandu Santuş az aşın duzu deyildi, təbii ki. İlk dəfə idi görürdüm ki, AFFA-nın baş katibi dərhal millinin baş məşqçisindən bu şəkildə üz döndərir. Əslində, bu da camaatın gözündə xal qazanmağa hesablanmış addım idi. Əgər elə olmasaydı, Cahangir Fərəcullayev növbəti Fransa və Polşa səfərlərində də media önünə çıxar, AFFA İcraiyyə Komitəsinin qərarı olmadan Fernandu Santuşun necə istefaya göndərilməsindən, AFFA İcraiyyə Komitəsinin qərarı olmadan Ayxan Abbasovun necə milliyə baş məşqçi təyin olunmasından, AFFA İcraiyyə Komitəsinin qərarı olmadan U-21-in necə A kateqoriyası belə olmayan Rəşad Eyyubova tapşırılmasından danışardı. 0:5 uduzan məşqçiyə döşəməyə nə var ki...

Uzun sözün qısası, 9 aydan artıqdır AFFA-nın baş katibi olan Cahangir Fərəcullayev bu müddətdə başqa heç nə ilə yadda qalmayıb. Ad günü fotoları və 2-3 açıqlama isə fəaliyyət deyil, cənab baş katib.

İBRAHİM